Eskom is besig om ’n nuwe kragbesparingsprogram te ontwikkel waarvolgens verbruikers beheer gaan hê oor die bestuur van hul elektrisiteit.

“Verbruikers sal maandeliks spesifieke kwotas krag ontvang wat hulle nie mag oorskry nie. Waar Eskom in die verlede beurtkrag toegepas het en verbruikers geheel en al afgesit het om besparingsteikens te bereik, sal verbruikers nou self kan besluit wat hulle afsit en wanneer. Verbruikers mag net nie hul kwotas oorskry nie.”

Só lui ’n verklaring wat Eskom aan Sake24 gestuur het.

Eskom sê Suid-Afrika se elektrisiteitstekort oor die volgende vyf jaar sal nie deur die bou van nuwe kragstasies in Limpopo en Mpumalanga ongedaan gemaak word nie. Die nuwe kragstasies sal net die probleem verklein.

“Die energie-besparingskema (EBS) word gevolglik deur Eskom namens die departement van minerale en energie ontwikkel om dié gaping toe te stop.”

Eskom sê sonder die EBS sal omvattende uitgebreide beurtkrag in die volgende vyf jaar uitgevoer moet word om die elektrisiteitsnetwerk te beskerm.

Die EBS is reeds op ’n vrywilliger-basis ingestel, maar Eskom sê daar was tot nou min samewerking.

“Gevolglik is die departement van minerale en energie en die nasionale energiereguleerder (Nersa) besig om ’n stel regulasies en reëls saam te stel wat strafmaatreëls sal bevat vir verbruikers wat nie binne hul toegedeelde kwotas bly nie.”

Die plan is om die eerste fase van die verpligte deelname aan die EBS so gou moontlik in werking te stel, maar Eskom sê hy verwag dit sal eers vroeg volgende jaar wees.

“Die finale datum sal deur Nersa vasgestel word.”

Eskom sê nie alle verbruikers sal aanvanklik deur die voorgestelde EBS geraak word nie.

“Verbruikers met ’n jaarlikse kragverbruik van meer as 25G Wh sal eerste aan die beurt kom. Dit verteenwoordig sowat 250 van Eskom se grootste kliënte, insluitend ’n aantal groot munisipaliteite.

Die uiteindelike mikpunt is om die program uit te brei na alle verbruikers wat jaarliks meer as 100 MWh elektriese krag verbruik.”

Verbruikers se werklike kragverbruik sal maandeliks vergelyk word met hul kwota. Indien die kwotas oorskry word, sal verbruikers meer moet betaal vir hul krag. Die boetes sal styg in ooreenstemming met hoe gereeld die kwotas oorskry word en met hoeveel die kwotas oorskry word.

“Die gemiddelde besparing waarna Eskom mik is 10% – die hoeveelheid wat nodig is om die nasionale elektrisiteitsnetwerk te stabiliseer.”