Volgens mnr. Chris Day, gebiedsprinsipaal van Pam Golding Eiendomme (PGE), wat die ontwikkeling bemark, is huise beskikbaar teen ’n gemiddeld van R2 850 per m². Dit kom neer op van R345 000 vir ’n huis van 114 m² tot R615 000 vir ’n huis van 256 m².

Terwyl die gemiddelde huisprys in die middelsegment van die mark volgens Absa se nuutste huisprysindeks tans R973 905 is, klink dit amper te goed om waar te wees.

Hy sê hoewel dit ouer huise is, is die strukture stewig en is dit ideaal vir eerste kopers wat sukkel om tot die mark toe te tree, asook vir gesinne met kinders.

“Die werklikheid is dat kopers ’n huis van 173 m² met drie slaapkamers kan verkry teen R496 000, waar alle koste ingesluit is.”

’n Bykomende voordeel is dat kopers met registrasie R30 000 van die koopsom sal terugkry van die ontwikkelaar, Fifth Season Investments, om die huise te restoureer om by hul behoeftes aan te pas.

Dié ontwikkeling genaamd Strubenvale Extension 2 behels 137 bestaande ou mynhuise en 157 erwe.

Day sê die erwe wissel tussen 600 m² en 1 000 m² teen pryse van R179 000 tot R198 000. Daar is ook ’n perseel opsygesit vir die ontwikkeling van ’n gerieflikheidswinkelsentrum en ’n bykomende 169 erwe is aan ’n ontwikkelaar verkoop. Day sê die ontwikkeling sal ’n nuwe voorstad word en is noord van die bestaande Strubenvale-gebied, met maklike toegang tot die N12 wat Witbank met Johannesburg verbind.

Bouwerk aan die 2,1 m hoë sekuriteitsmuur van 5,8 km het reeds begin en die erwe en huise word nou aan die mark bekend gestel.

Hy sê Springs bied nog goeie waarde vir geld vir residensiële eiendom en dis ’n gebied waar kinders nog in die straat kan speel, selfs voor die veiligheidsmuur opgerig is.

Die totale kompleks sal oor twee bemande ingange beskik en ’n gemeenskaplike swembad en muurbalbane wat deur die huiseienaarsvereniging besit sal word.