Die proses behels ’n tegniese werkgroep van plaaslike en internasionale kundiges wat besig is om die Australiese Green Star-graderingstelsel vir die Suid-Afrikaanse bou-omgewing aan te pas.

Kerswill sê die vestiging van ’n graderingsinstrument is ’n kernprioriteit omdat dit standaarde sal stel vir groenbou en duidelike riglyne sal gee vir groen geboue.

“Dit is ’n dringende kwessie omdat talle korporatiewe ondernemings al voortgaan met groen geboue en na ’n verskeidenheid instrumente kyk,” sê hy.

Die tegniese werkgroep behels ’n vrywilligerpaneel van 20 plaaslike kundiges in verskillende kennisvelde om met finale krediete en riglyne vorendag te kom.

Aan die internasionale front is me. Michelle Malanca van Sustainability Consultants aangestel as projekbestuurder om die proses te stuur, asook die ingenieurs-konsultantegroep Arup as tegniese konsultante. Malanca is in San Francisco gesetel, maar was voorheen die direkteur van Green Star vir die Australiese Raad vir Groenbou.

Malanca sê Green Star beslaan agt omgewingskategorieë, asook ’n innovasie-kategorie.

Die omgewingskategorieë is bestuur, gehalte van die binnenshuise omgewing, energie, vervoer, water, materiale, grondgebruik, ekologie en uitlaatgasse.

Sy sê elke kategorie sal krediete hê waaraan ’n aantal punte toegeken is. “Wanneer ’n gebou gegradeer word, kry dit punte vir elke krediet waaraan voldoen is en ’n telling uit 100 word vasgestel.”

So sal 45 tot 59 punte geklassifiseer word as beste praktyk, 60 tot 74 punte as Suid-Afrikaanse uitnemendheid en meer as 74 as wêreld-leierskap.

Geboue wat ’n gradering van vier sterre of meer kry, sal ’n Green Star-sertifisering kry.

Die toekenning kan óf in die beplanningsfase gedoen word óf wanneer die gebou voltooi is.

Sy sê die grootste uitdaging vir Suid-Afrika is om ’n fyn balans te handhaaf met die standaarde wat in ooreenstemming is met internasionale beste praktyk en die Suid-Afrikaanse bedryf vorentoe sal neem, terwyl plaaslike omstandighede gerespekteer word sodat dit nie onmoontlik is om graderings te behaal nie.

Die Suid-Afrikaanse Raad vir Groenbou-inisiatief is verlede jaar op die jaarlikse konvensie van die Suid-Afrikaanse Vereniging van Eiendomseienaars (Veesa) bekend gestel.

Mnr. Neil Gopal, uitvoerende hoof van Veesa, sê die Suid-Afrikaanse bou-omgewing beweeg in die regte rigting en is besig om met rasse skrede die agterstand in te haal om in ooreenstemming met wêreldstandaarde te kom.

Hy sê eiendomseienaars begin die waarde insien van omgewingsvriendelike geboue.

“Al is die aanvanklike koste hoog, sal gebou-eienaars van groen geboue op lang termyn die vrugte pluk van die bedryfskoste wat oor tyd beduidend afneem.”