Die eerste bewegende wolkekrabber ter wêreld, waarvan die vloere gaan roteer, gaan teen $700 miljoen in Doebai uit die grond verrys.

Daar is ook planne om ’n soortgelyke toring van 70 verdiepings in Moskou op te rig, het BBC News berig.

“Die Doebai-toring sal die eerste gebou nóg wees wat roteer, beweeg en van vorm verander en dit gaan boonop energiedoeltreffend wees,” het mnr. David Fisher, die Italiaanse argitek van die beplande argitektoniese meesterstuk, by die bekendstelling gesê.

Die gebou, wat 420 m die lug in gaan toring, sal in ’n leeftyd nooit twee keer dieselfde lyk nie.

Die 80 wooneenhede, wat vooraf vervaardig sal wees, sal onafhanklik van mekaar rondom ’n sentrale kolom roteer deur middel van 79 reusekrag-genererende windturbines tussen elke twee vloere.

Die gebou sal, wat energie betref, selfonderhoudend wees omdat die windturbines genoeg elektrisiteit sal opwek om die hele gebou van krag te voorsien en selfs ekstra krag vir die netwerk, volgens Fisher.

Dié eenhede wat tussen een en drie uur sal neem om ten volle te roteer, sal tussen $3,7 miljoen en $36 miljoen kos.

Fisher sê hy noem die geboue dinamiese torings omdat hulle ontwerp is deur tyd en gevorm word deur lewe.

Reuters berig dat die wolkekrabber in Moskou deur die Russiese eiendomsontwikkelingsgroep die Mirax Group opgerig gaan word en die een in Doebai deur Fisher se Rotating Tower-tegnologiemaatskappy.

Saam met swembaddens en tuine, sal die gebou ook van motorhysbakke voorsien word, sodat inwoners hul voertuig buite hul wooneenheid kan parkeer.

Mnr. Leslie Robertson, wat die strukturele ingenieur was vir die twee torings van New York se Trade Center, is ’n ingenieurskonsultant vir Fisher se maatskappy.

Die twee geboue het in September 2001 ingestort nadat twee gekaapte vliegtuie teen hulle vasgevlieg het.

Albei die geboue sal na verwagting teen die einde van 2010 die lig sien.

Die nuwe tendens waar die fokus op bewegende wolkekrabbers is, volg op die oprigting van verskeie ikoniese mega-torings die wêreld oor.

Een van die mees opspraakwekkende geboue nóg is die Burj Dubai in Doebai, wat die hoogste gebou ter wêreld sal wees teen meer as 700 m.

Daar is egter reeds ’n superhoë gebou in die beplanningsfase, die Burj Mubarak Al-Kabir in Koeweit, wat na verwagting 1 001 m hoog sal wees.

Die hoogste gebou in die VSA, die Chicago Spire, is ook onlangs bekend gestel.

Dié wolkekrabber gaan oor 150 verdiepings beskik, wat 609,6 m die lug in spiraal.

Die ontwikkeling op die oewer van die Michigan-meer in Chicago, Illinois, kom teen ’n koste van meer as $2 miljard en sal oor 1 194 individuele tuistes beskik.

Uit ’n Suid-Afrikaanse perspektief, twyfel argitekte of die land ooit sulke mega-strukture gaan kry.

Mnr. Niel Crafford van Crafford & Crafford Argitekte, sê een van die groot redes is die astronomiese koste daaraan verbonde.

Hy sê die meeste van die wêreldstede gebruik die geboue om ’n stelling te maak. In Doebai word dit opgerig as trekpleister vir toeriste, wat finansiële voordele inhou vir die land wanneer sy olievoorraad opdroog.

In internasionale stede is daar ook ’n gebrek aan grond, wat dus lei tot wolkekrabbers, meen hy. In Suid-Afrika is daar nog meer as genoeg grond om op te bou en verskeie middestedelike gebiede wat herontwikkel kan word.

Hy sê ook met die huidige maatskaplike fokus van die land om onder meer bekostigbare huisvesting te verskaf, gaan dié tipe van strukture moeilik geregverdig word.