In die residensiële mark wat weens onder meer die stygende rentekoers en die Nasionale Kredietwet beduidend afgekoel het, is dit nou die tyd vir kopers met kontant om in die koop-om-te-verhuur-mark te belê, meen rolspelers.

Mnr. Mike Bester, uitvoerende hoof van Realty 1 International, sê dis mits die beleggers bereid is om ’n paar beproefde goue reëls te volg. “Dit sluit ’n stewige deposito in omdat ’n koper met ’n 80%-verbandlening nie kan verwag om huurgeld te kry wat sy maandelikse verbandterugbetaling ten volle gaan dek nie,” sê hy.

Hy waarsku ook dat kopers op hul hoede moet wees vir word-gou-ryk-skemas, wat spekulatiewe kopies insluit en huurwaarborge om kopers te lok.

Nog ’n goue reël is dat die beleggers ’n langtermyn-siening moet hê. “Eiendom is tradisioneel ’n langtermynbelegging en kopers in die koop-om-te-verhuur-mark moet daarop fokus om hul welvaart oor tyd op te bou en nie met vinnige winste nie,” sê hy. Op dié manier sal die belegger nie so erg geraak word deur korttermyn-wisselings in die mark nie.

Dan moet die koper se beleggingsfokus op inkomste wees, nie op kapitaalgroei nie. “Om ’n eiendom te besit, verteenwoordig nie noodwendig rykdom nie, maar om ’n bestendige inkomste uit ’n portefeulje huureiendomme te verdien, moenie onderskat word nie.”

Die huurmark floreer op die oomblik, grootliks as gevolg daarvan dat verbandpaaiemente onbekostigbaar geraak het, veral vir kopers in die goedkoper segment van die huismark.

“Die grootste vraag na huureiendomme is in die goedkoper segment onder R500 000, waar mense dit eenvoudig nie kan bekostig om ’n eie huis te koop nie.”

Koop-om-te-verhuur is ’n uitstekende manier om ’n eiendomsportefeulje op te bou en welvaart te skep. Hy sê die huurmark gaan van krag tot krag en huurgeld wat tot 60% van ’n koop-om-te-verhuur-belegger se maandelikse paaiement dek, word al verkry en dis op pad na 70%.

Teken in op Beeld, Die Burger of Volksblad om jou Sake24 elke dag te kry