Mnr. Lew Geffen, voorsitter van Sotheby’s International Realty, het Levin in die pad gesteek kort nadat ’n omstrede stelling van Geffen – dat huispryse met 40% gaan daal – ’n herrie in die mark ontketen het.

Levin het vroeër aan Sake24 gesê Geffen het sy kontrak beëindig omdat hy nie toestemming gegee het dat die interne memorandum met die omstrede stelling na die pers gestuur mag word nie.

Geffen het sedertdien dié vooruitskatting in ’n onderhoud met die Financial Mail teruggetrek.

Levin het gister ’n verklaring aan die media uitgereik waarin hy waarsku teen “roekelose, ongegronde bedryfskommentaar”.

Levin het gesê leiers in die eien?domsmark moet meer verantwoordelik wees wanneer op die toestand van die mark kommentaar gelewer word. Volgens hom kan huiseienaars uit dié omstredenheid leer dat baie van die eiendomsmenings in die media “nie feitelik en nagevors” is nie, maar eerder “ ’n poging deur mededingende eiendoms?base is om tot elke prys hul maatskappy se naam in druk te kry”.

Hy het gesê met die uitsondering van die nasionale banke, navorsingsgroepe en betroubare ekonome, behoort eiendomsbeleggers eiendomsnavorsing “geheel en al te ignoreer”.

“Goeie kommunikasie is deurslaggewend in onstuimige en moeilike tye, en dit is belangrik dat inligting deur gepaste ontleding gesteun word om ’n siening oor die data te ondersteun.”