Vir dié prys kry die koper ’n luukse dakwoonstel-eenheid in Afrika se hoogste residensiële gebou – 56 vlakke van byna 200 m hoog.

Die Ponte is ’n 32 jaar oue silindervormige residensiële baken wat grens aan Hillbrow en Berea in Johannesburg.

Volgens Pam Golding Eiendomme (PGE), wat nou die eenhede in die gebou bemark, is altesame 70 uit die sowat 460 gemeubileerde eenhede al verkoop. Dié gebou sal voortaan die “New Ponte” heet.

Die gewone deeltitel-eenhede vir die eerste verkoopsfase kos tussen R412 000 vir die enkelwoonstelle en R920 000 vir die drie-slaapkamer-woonstelle. Die luukse dakwoonstelle verkoop vir heelwat meer.

“Die feit dat dit eintlik PGE se eerste residensiële onderneming in die stadsgebied is, sê baie van ons vertroue in die konsep en die visie wat dié opwindende herontwikkeling onderlê,” het mnr. André Dippenaar, hoof van PGE se ontwikkelingsafdeling, gister gesê.

Die gebou is tans nog ’n bouperseel met ’n verkoopskantoor, maar die eerste inwoners sal voor die einde van die jaar kan intrek.

Volgens Dippenaar toon ’n opname dat die eenhede vir tussen R3 500 en R6 500 per maand verhuur kan word.

Wanneer die gebou voltooi is, sal ’n geraamde 2 500 mense daarin woon.

Dippenaar sê Pam Golding wil die gebou weer ’n gesprekspunt maak. Dit is gekoop vir R100 miljoen en die hernuwing kos R160 miljoen.

Ander verwagte vernuwingsinisiatiewe vir die Ellispark-omgewing aan die voet van Ponte, sluit die Johannesburg Development Agency se R700 miljoen-plan om nuwe lewe in die gebied te blaas met die oog op die Wêreldbeker-sokkertoernooi 2010, asook die beplande roete van die nuwe snelbusstelsel in.

Mnr. David Selvan, ontwikkelaar en mede-eienaar, se visie vir die nuwe Ponte:

“Verbeel jou jy word wakker in ’n gemeubileerde woonstel op die 32ste vlak van die Ponte, ’n Helikopter vlieg verby en jy wuif vir die vlieënier . . . hy wuif terug.

“Dit is 04:30 en dit neem 25 sekondes om met die hysbak na die grondvlak te ry waar jy buite in die tuin om die baan gaan draf. Jou lewensmaat gaan na die gimnasium in die gebou. Jy neem jou kinders skool toe – St. Johns, KES en Roedean is net vyf minute se ry en weer vyf minute terug. Jy ry met die snel-busstelsel en die Gautrein werk toe. Jy los vandag jou kar tuis. Ná werk terug by die Ponte drink jy ’n koffie op die piazza, maak jou skootrekenaar oop en koppel met die draadlose internet in die gebou. Wie sal nie hier wil woon nie?”