Mnr. Brian Azizollahoff, uitvoerende hoof van Redefine, het sê dit het ’n verandering in die denkwyse van die beleggersgemeenskap tot gevolg gehad, waar buitelandse diversifikasie nou skerper in die kollig val.

In die onlangse Property Innovation-publikasie van Madison sê mnr. Mike Watters, uitvoerende direkteur van Ciref, buitelandse eiendom bied aan Suid-Afrikaanse beleggers die voordele van diversifikasie oor bateklasse en geografiese gebiede heen, asook blootstelling aan buitelandse inkomstestrome.

“Ondanks huidige toestande in finansiële markte, bly buitelandse eiendom ’n bateklas wat in elke belegger se portefeulje behoort te wees.” Ciref is Corovest International se eiendomsfonds wat op die alternatiewe beleggingsmark (AIM) van die Londense aandelebeurs genoteer is.

Azizollahoff sê tradisioneel het Suid-Afrikaanse eiendomsmaatskappye nie sommer in die buiteland belê nie omdat die vooruitopbrengste op buitelandse eiendomsbeleggings in ontwikkelde lande, soos die VSA, Brittanje en lande in Europa veels te laag was om aantreklik te wees vir Suid-Afrikaanse eiendomsmaatskappye. “Die verkryging van sulke bates sou die inkomste verwater, wat ’n negatiewe uitwerking sou hê op die verkryger se aandeelprys.”

Hy reken daar is in die huidige klimaat waarde in die eiendomsektore in die VSA, Brittanje en lande in Europa, wat nog nie voorheen gebied is nie. Hy sê die opbrengste van regstreekse eiendomsbeleggings sowel as genoteerde beleggings is selfs hoër as die opbrengste in Suid-Afrika. Ter illustrasie gebruik hy die beweging in die pryse van die drie grootste Britse eiendomsbeleggingstrusts (reits), Land Securities, Hammerson en Liberty International.

“Die val in die waarde was dramaties – tot 50% – hoewel die netto batewaarde nie so dramaties afgeneem het nie.”

Dit is ook die geval in die VSA, waar twee genoteerde reit-maatskappye, die Worldwide Realty-inkomstefonds en die Reit & Preferred-inkomstefonds teen opbrengste van onderskeidelik 12% en 20% verhandel. Daar is verskeie ander reits met opbrengste van meer as 10% wat beleggings bied in bates in gehalteportefeuljes, sê hy. Volgens Watters is daar verskeie buitelandse eiendomsbeleggingsopsies, onder meer genoteerde eiendomsmaaatskappye, reits, private sindikasies, eiendomstrusts en regstreekse eiendom. “Die tipe beleggingsinstrument hang af van die belegger se omstandighede.”

Hy meen egter die genoteerde eiendomsektor hou die voordele in van likiditeit en deursigtigheid. Daarteenoor word ’n belegging in regstreekse eiendom gekenmerk deur hoë intree- en uittreekostes en relatiewe lang tydsraamwerke.