Die Kliphuis in Mooikloof, Pretoria, is in ’n stemming aangewys as die beste gebou in Suid-Afrika.

Dié stemming was deel van die vierde jaarlikse nasionale argitektoniese opname deur die Suid-Afrikaanse dekortydskrif VISI, in samewerking met die Suid-Afrikaanse Instituut vir Argitekte (SAIA).

Die resultate is bekend gemaak om saam te val met Wêreldargitektuurdag op Maandag 6 Oktober.

Weaver’s Nest, ’n private woning in Kaapstad, was in die tweede plek, gevolg deur ’n nuwe ateljee op die plaas Kromdraaivallei by die Wieg van die Mensdom. Dié drie geboue het 22 deelnemers uitgestof.

Die opname, wat aan 2 500 respondente landwyd gestuur is, het Suid-Afrikaners genooi om vir hul gunstelinggebou te stem deur op VISI se webwerf aan te meld.

Elk van die geboue is ’n ontvanger van ’n 2008 Corobrik SAIA Merietetoekenning.

Verder is elkeen genomineer vir die Corobrik SAIA Toekennings vir Uitnemendheid wat later vandeesmaand aangekondig sal word.

Die Kliphuis, wat ontwerp is deur Slee & Co Argitekte van Kaapstad, het nie net die eerste plek landwyd nie, maar ook in die Gauteng-streek behaal.

Respondente was beïndruk deur die manier waarop die argitek elemente van Afrika met ’n moderne ruimte laat saamsmelt het.

Ander bemoedigende faktore was die gebruik van natuurlike materiale wat op die terrein beskikbaar was, en die feit dat die gebou-ontwerp dui op die verskyning van ’n unieke Suid-Afrikaanse styl.