Hy het in antwoord op ’n vraag in die parlement gesê ’n aanvanklike ondersoek wat na die uitwerking wat die kwotas op 24 klereprodukte en 7 tekstielprodukte gehad het en wat in oorleg met die Chinese regering gedoen is, toon ’n baie beduidende afswaai in die invoer van klere- en tekstielprodukte uit China. Dit het ook ’n aansienlike daling in die totale invoere van klere en tekstiele na Suid-Afrika tot gevolg gehad.

Voordat die kwotas ingestel is, het die invoere van klere en teks-tiele uit China vinnig gestyg. In die tydperk van 2000 tot 2006 het die invoer van hierdie klere- en tekstielprodukte jaarliks met onderskeidelik gemiddeld 42% en 35% toegeneem. Dit was ver bokant die gemiddelde groei wat die totale invoer van 28% vir klere en 10% vir tekstiel oor die dieselfde tydperk getoon het.

Die gevolg was dat China se aandeel aan die invoer van klere en tekstiel van 2000 tot 2006 skerp toegeneem het, van onderskeidelik 41% tot 75% vir klere en van 11% tot 35% vir tekstiel.

Ná die instel van die kwotas het klere-invoer uit China egter met 25% gekrimp en die groei van tekstielinvoer tot 2% verlangsaam. Die gevolg was ’n afname in die aandeel van Chinese klere-invoer as ’n persentasie van die totale invoer van 75% tot 61% en in die geval van tekstiel van 35% tot 33%.

Mpahlwa het gesê die invoer van klere en tekstiel uit ander lande het wel ná die instel van die Chinese kwotas in 2007 beduidend gestyg, maar dit was meestal van ’n baie lae basis af. Die aandeel van Chinese invoer aan totale invoer was só beduidend dat die verlangsaming daarvan die toename in ander invoer ver oorskry en uitgekanselleer het.

Totale klere-invoer het in 2007 met 8% gekrimp, terwyl die groei van tekstielinvoer van 18% in 2006 tot 9% in 2007 verlangsaam het.