Die rand het aanvanklik in reaksie op die aankondiging van die April-data met meer as 10c tot R7,74 teenoor die dollar verswak, maar laatmiddag op R7,70 gestabiliseer.

Die April-data wys dat die bruto goud- en valutareserwes in die maand 0,32% of $110 miljoen laer op $34 284 miljard te staan gekom het. Die netto reserwes of internasionale likiditeitsposisie (ILP) was 0,46% of $152 miljoen laer op $32 973 miljard.

Dit is die eerste keer in twee jaar dat die reserwes nie styg nie met die netto reserwes tans sowat $10 miljard groter as in Januarie 2007.

Stygende reserwes is nodig om vertroue in die rand te handhaaf, juis omdat Suid-Afrika se reserwes swak afsteek by ander ontluikende lande.

Al het die Reserwebank nog nooit ’n spesifieke reserweteiken bekend gemaak nie, beskou ekonome die huidige vlakke steeds as te laag.

Ekonome het aanvanklik die swakker data toegeskryf aan die ?laer goudprys, wat van gemiddeld $936,95 per fynons in Maart tot $871,60 in April gedaal het.

Dit het die waarde van die goudreserwes met 6,97% of $261 miljoen van $3,745 miljard (sowat R30,324 miljard) tot $3,484 miljard (sowat R24,460 miljard) laat daal.

Die Reserwebank het nie bekend gemaak hoeveel valuta in die maand gekoop is nie.

Volgens me. Salomi Odendaal, ekonoom van Citadel, blyk dit dat dit ruweg $150 miljoen beloop – heelwat minder as die voorafgaande maande se gemiddelde aankope van sowat $500 miljoen.

Dit is ondanks die verstewiging van die rand van gemiddeld R8,10 in Maart tot R7,595 in April, wat die Reserwebank ’n gulde geleentheid gebied het om die reserwes aan te vul.

Odendaal sê dit lyk nie of die Reserwebank baie aktief in die mark was nie. “Dit is ’n verandering teenoor die vorige maande waar die Reserwebank valuta gekoop het selfs toe die rand swak was.”

Sy sê ’n moontlike rede kan wees dat die Reserwebank die sein wil uitstuur dat die rand nie te sterk moet wees nie.

’n Swakker rand is nodig om die tekort op die lopende rekening te verklein deur uitvoer te bevoordeel.

Indien só ’n strategie gevolg is, stem dit ooreen met voorstelle van die groep internasionale kundiges onder die voorsitterskap van prof. Ricardo Hausmann van die Harvard-universiteit, wat eergister bekend gemaak is.

Daar is onder meer aanbeveel dat die rand stabiel bly en nie noodwendig te veel moet verswak nie aangesien dit inflasie sal aanwakker.

Mnr. Dennis Dykes, hoofekonoom van Nedbank, sê die Reserwebank se optrede kan dui op ’n minder rigiede benadering. “Tot op hede is reserwes opgebou ongeag die markomstandighede wat onbedoeld tot ’n swakker rand kon lei.”

Mnr. Fanie Joubert, ekonoom van die Efficient-groep, verwag egter geen wesenlike verandering in die strategie om valuta te koop om die reserwes aan te vul nie.

Die belangrikste rede vir April se dalende syfer is die waardeaanpassings weens die laer goudprys, het hy gesê.