Dié land is nou 53ste uit 55 van die wêreld se kragtigste ekonomieë, drie plekke swakker as verlede jaar, volgens die nuutste verslag oor internasionale mededinging van die Instituut vir Bestuursontwikkeling (IMD) in Lausanne, Switserland.

Die VSA is steeds in die eerste plek, gevolg deur Singapoer, Hongkong en Switserland.

“Die agteruitgang is onder meer as gevolg van ’n hoë werkloosheidsyfer, stygende inflasie, stagnante uitvoer en infrastruktuur-bottelnekke, sê mnr. Sello Mosai, uitvoerende bestuurder van Produktiwiteit Suid-Afrika (PSA).

Dit het die land se sakevertoning met ses plekke laat verswak van 32ste tot 38ste en sy ekonomiese vertoning van 54ste tot 55ste.

Dr. Hischam El-Agamy, direkteur van korporatiewe ontwikkeling van die IMD, sê Suid-Afrika is die enigste Afrika-land op die ranglys en hy ding mee met van die wêreld se grootstes.

Hy sê uit die resultate is dit duidelik dat geen land immuun is teen internasionale ekonomiese faktore nie. Dis nie net Suid-Afrika wat getref word deur hoër olie- en voedselpryse nie. Die mededingendheid van sterk groeiende ekonomieë soos China en Indië het ook deurgeloop.

Dié lande het elk twee plekke prysgegee tot onderskeidelik nommer 17 en nommer 29.

Hy sê daar is ’n waterskeiding tussen Suid-Afrika se staatsdoeltreffendheid en sy infrastruktuur-mededinging. Die staat se doeltreffendheid het met sewe plekke verbeter tot 28ste, wat nie strook daarmee dat hy laaste is wat infrastruktuur betref nie. Hy glo die uitdaging is dat die staat en die private sektor verskeie taakmagte moet vorm om elke sektor se vertoning te bespreek.

Die groot vraag is of die VSA sy eerste plek gaan behou. Hy beskou vanjaar as ’n moontlike draaipunt waar Singapoer die VSA kan onttroon.

Volgens die IMD is heelwat lesse geleer in die 20 jaar dat hy mededinging meet. “In die woorde van Benjamin Franklin kan selfs ’n klein gaatjie ’n groot skip sink,” sê prof. Stéphane Garelli van die IMD.

Die IMD se mededingingstelbord word bereken deur die vier faktore van mededinging: ekonomiese vertoning, regeringsdoeltreffendheid, sakedoeltreffendheid en infrastruktuur, gegrond op 331 kriteria.