Sake was in die oggendure so fluks dit het gelyk of die indeks van alle aandele deur 33 000 sou breek. Maar ’n mate van soberheid het later ingetree, en die indeks het die dag afgesluit op 32 700,98, 53,55 punte of 0,16% sterker vir die dag.

Die moontlikheid dat die Chinese in Billiton belang stel en die moontlike MTN-oorname deur ’n Indiese maatskappy het vroeg reeds vir optimisme gesorg.

Dit is opgevolg deur stewige belangstelling in platinumaandele en in Lonmin, oënskynlik deur buitelandse kopers. Die hernieude styging in die goudprys tot bo $900 per fynons het die belangstelling in goudaandele geprikkel.

Buitelanders was in ’n koopbui ná beter as verwagte groeisyfers uit Duitsland en die voortgesette stabilisering van die Amerikaanse ekonomie.

Die rand het ook besluit om tot die partytjie toe te tree en deur R7,50 teenoor die dollar gebreek tot R7,47. Verskeie faktore ondersteun die rand nou, onder meer verwagte hoër rentekoerse en miljarde dollar wat as deel van die MTN-transaksie omgeruil kan word.

Volgens sommige vooruitskattings kan die rand vandeesweek selfs tot R7,20 verstewig.

Die JSE se indeks van alle aandele het die afgelope drie dae elke dag op ’n hoogtepunt afgesluit. Die indeks het die week afgeskop op 32 145,49.

Die slegte nuus is dat ontleders en portefeuljebestuurders minder positief is of dit volgehou sal word.

Merrill Lynch se gesaghebbende fondsbestuurdersoorsig, wat gister uitgereik is, wys dat 75% van die bestuurders meen ekonomiese omstandighede sal oor die volgende 12 maande versleg teenoor 50% in die vorige maand.

Verdienstegroei by ondernemings is van 13,6% tot 11,8% afgeskaal, maar 88% meen steeds ’n resessie is onwaarskynlik.

Rand-Aksepbank (RAB) skryf in sy daaglikse valuta-oorsig die beter internasionale stemming daaraan toe dat die olieprys van sy rekordhoogtes afgeplat het. Dit verbeter die kanse vir beleggings in meer riskante bates in ontluikende lande. Maar ook RAB meen die goeie nuus is onvolhoubaar.

“ ’n Volhoubare breek deur R7,50 vir die rand is onwaarskynlik, en Amerikaanse behuisingsdata is ’n risiko vir ’n verdere verswakking.”

Die MTN-transaksie sal na verwagting ook nie die rand ondersteun nie as dit deur ’n samesmelting of aandeleruiling gekenmerk word, sê RAB.

Moontlike laer ekonomiese groei kan later vanjaar begin om sy tol van die rand te eis. Moody’s Economy.com sê in sy weeklikse oorsig die swakker groei in die kleinhandel, wat vandeesweek bekend gemaak is, voorspel laer BBP-groei vir die jaar. En die Reserwebank lyk vasbeslote om rentekoerse met nog 0,5 persentasiepunt op te stoot.

Geen syfer van die verwagte BBP-groei vir die eerste kwartaal is uitgereik nie, maar ekonome voorspel nou dat dit laer as 4% kan wees.

Laer groei was in die verlede negatief vir die rand.