Dít blyk uit ’n opname wat Sake24 gister gedoen het deur willekeurig 14 luukse motors te kies en húl verkope te vergelyk met die algehele verkope van nuwe motors.

Volgens die nasionale vereniging van voertuigvervaardigers van Suid-Afrika (Naamsa) het verbruikers in Junie 21,9% minder nuwe voertuie in die geheel teenoor dieselfde maand ’n jaar gelede gekoop.

Die veertien geselekteerde luukse voertuie, wat uit dié algehele poel voertuie gekies is, het egter in dieselfde tydperk 54% minder verkoop as ’n jaar gelede.

Sake24 het onder meer gekyk na die BMW X5, die Mini Cooper, die Mercedes E-klas, die Jeep Grand Cherokee en die Audi A8. Die verkoopsyfers van dié spesifieke motors is ook uit Naamsa se verkopedata vir Junie 2007 en Junie 2008 gekry.

Die daling in die verkope van nuwe voertuie in die geheel word toegeskryf aan duurder brandstof, hoër rentekoerse, huishoudelike skuld en die dalende verbruikersvertroue.

Volgens me. Jaandré Fourie, ’n ontleder by Metropolitan-batebestuur, het die hoër helfte van die LSM-groepe (lewenspeilgroepe) gewoonlik groter blootstelling aan rentekoerse as ander.

“Uitgawes waaroor verbruikers hul diskresie kan gebruik (soos die luuksheid van hul voertuie) word gewoonlik eerste gesny,” het sy gesê.

’n BMW X5 sal ’n koper sowat R600 000 uit die sak jaag, ’n Jeep Grand Cherokee sowat R500 000 en ’n Mini Cooper sowat R200 000, terwyl meer algemeen bekostigbare voertuie, soos ’n Toyota Yaris en Ford Fiesta, sowat R130 000 kan kos – afhangende van die model en bykomstighede.

Volgens Fourie was baie voertuigkategorieë sowat twee jaar gelede op rekordverkoopvlakke.

Mense het toe om verskeie redes makliker gekoop, soos dat daar voor die instelling van die Nasionale Kredietwet makliker toegang tot skuld was.

Verbruikers het tóé ook nie noodwendig voorsorg getref met die oog op verdere rentekoersstygings nie.

“Brandstof is ook iets wat deesdae in gedagte gehou word met die koop van die groter luukse motors, soos byvoorbeeld ’n Pajero,” het sy gesê.

Naamsa sê die verkoop van nuwe voertuie sal na verwagting onder druk bly vir die res van 2008 weens die uitwerking van verhoogde rentekoerse, inflasionêre druk, hoë vlakke van persoonlike skuld en ’n verlangsaming in ekonomiese aktiwiteite.