Die JSE se indeks van alle aandele het gister op 28 172,28 punte gesluit, 7% laer as in die begin van die week.

Die indeks van alle aandele is amper 11% laer as ’n maand gelede en meer as 15% laer as die jaarhoogtepunt van 33 232,89 punte op 22 Mei. Sedert die begin van die jaar het die indeks met amper 4% gedaal.

Hulpbronaandele het die afgelope week ’n negatiewe invloed op die JSE gehad.

Die mynbou-indeks het gister met 1,5% gesak en was 10% laer as die begin van die week.

Dié aandele het gesamentlik die grootste gewig op die JSE en dra R2 230 miljard, of meer as 52%, van die mark se totale markwaarde van R4 720 miljard by.

Mnr. Tony Gibson, ’n uitvoerende direkteur van Coronationfondsbestuurders, meen die groot steunpilare van die aandelemark, naamlik die energie- en hulpbronsektor, begin nou sterker teenwinde ervaar.

Mnr. Francois Venter, ’n aandelehandelaar van Investec-batebestuur, sê die olieprys het die afgelope week daagliks gestyg en die verwagte invloed op die insetkoste van myne het dié aandeelpryse laat daal.

Volgens Venter volg die JSE hoofsaaklik buitelandse markte en die vakansiedag in die VSA gister het wisselvalligheid uitgeskakel.

Europese aandele het gister ook laer geneig in gedempte verhandeling, en veral bank- en hulpbronaandele het gedaal, volgens Marketwatch.com van die Wall Street Journal.

Mnr. Grant Rossiter, ’n markkommentator van Barnard Jacobs Mellet, het gesê die afgelope maande se wisselvalligheid en die verskil tussen die vertoning van hulpbronaandele en aandele in die verbruikersektor is tot laat in die week voortgesit.

Volgens hom was daar “enorme volumes verhandelings”, vermoedelik hoofsaaklik deur institusionele beleggers. Dit het regdeur die mark plaasgevind en het aandele sterk afgetrek.

Venter en Rossiter het gesê die versterking van die rand gister hou moontlik ook verband met die gesprekke tussen MTN en Reliance Communications en die verwagte kapitaalinvloei wat dit tot gevolg gaan hê.

Volgens Rossiter doen ’n gerug die ronde dat Amerikaanse beleggers onder druk is om aandele in Impala Platinum te verkoop oor dié maatskappy se betrokkenheid in Zimbabwe. Impala Platinum-aandele het gister in waarde die meeste verhandel en 3,7% laer gesluit.