Die land, wat verlede jaar 32ste was in die Forbes-peiling oor die beste lande om in sake te doen, is vanjaar 39ste.

Altesame 121 lande is op grond van politieke en ekonomiese oorwegings, beskerming van beleggings en korrupsie beoordeel.

Denemarke is nommer een op die lys.

Met sy lae inflasie, lae werkloosheidsyfer, entrepreneurskap en tegnologiese skranderheid het Denemarke, wat verlede jaar vierde was, Ierland en Finland, onderskeidelik tweede en derde, op die neus laat kyk.

Die Deense ekonomie het volgens die verslag die afgelope paar jaar baie uitgebrei. Ekonomiese groei het reeds in 2004 momentum begin opbou.

“As gevolg van ’n groot bruto binnelandse produk per capita, welsyn-voordele, ’n lae Gini-indeks (wat ongelykheid meet) en politieke stabiliteit, is die Deense lewenstandaard van die hoogste ter wêreld,” lui die verslag.

Eskom word in die verslag genoem as een van die faktore wat groei in Suid-Afrika belemmer.

Suid-Afrika is ook drie plekke laer op die wêreldranglys van ekonomiese mededinging, wat in Junie bekend gemaak is. In dié verslag van die instituut vir bestuursontwikkeling (IMD) in Lausanne, Switserland, is Suid-Afrika 53ste uit 55 van die wêreld se sterkste ekonomieë.

Suid-Afrika word deur Forbes beskryf as ’n “ontluikende mark met ’n groot voorraad natuurlike hulpbronne, ’n goed ontwikkelde finansiële, regs-, kommunikasie-, energie- en vervoersektor, die 17de grootste aandelemark ter wêreld en moderne infrastruktuur wat die doeltreffende verspreiding van goedere na groot stedelike sentrums deur die streek ondersteun”.

Hoewel die ekonomie sedert 2004 goed gegroei het, word dit ingeperk deur werkloosheid en probleme met infrastruktuur, soos die elektrisiteitskrisis.

“Ekonomiese probleme wat die land sedert die apartheidsera knel, is steeds teenwoordig, soos armoede, ’n agterstand met die ekonomiese bemagtiging van voorheen benadeelde groepe en ’n tekort aan openbare vervoer,” lui die verslag.

Zimbabwe het die tweede laaste plek op die lys losgeslaan. Met ’n werkloosheidskoers van 80%, kon hy net-net beter vaar as Tsjad. “Die regering van Zimbabwe moet ’n wye verskeidenheid moeilike ekonomiese probleme die hoof bied, terwyl hy ook sukkel met ’n onvolhoubare fiskale tekort, ’n te hoë amptelike wisselkoers, hiperinflasie en leë winkelrakke,” lui die verslag.

Die VSA het met drie plekke teruggesak tot nommer vier en Brittanje is vyf plekke hoër op nommer vyf.

Lande wat die grootste spronge gemaak het, is Ierland, wat 19 plekke hoër is op nommer twee, Estland, wat 24 plekke hoër is op nommer tien en Saoedi-Arabië wat met 37 plekke geklim het tot nommer 47.