Mnr. Chris de Kok, hoof van bemarking en verkope van WesBank, het tydens die bekendstelling van dié bank se sakevertroue-indeks oor die voertuig- bedryf gesê dis veilig om te sê die totale terugnames landwyd is sowat 5 500 tot 6 000 per maand. Boonop raak dit die hele mark, van luukse voertuie tot intreevlak-modelle, en verbruikers van alle inkomstegroepe.

WesBank verteenwoordig sowat 35% van die mark vir voertuigfinansiering.

Met die bekendstelling van die indeks vir die eerste kwartaal van die jaar, is gesê die getal voertuie wat teruggeneem word, sal nie verder toeneem nie. Daar is toe gemeen die meerderheid mense wat onder druk sou kom om hul voertuigpaaiemente te betaal, het reeds deurgeloop.

De Kok het gister gesê WesBank het egter oor die afgelope maande ’n aggressiewer benadering tot terugnames gevolg. “Ons probleem is dat ’n voertuig se waarde daal. So die verlies wat gehanteer moet word, raak net al hoe meer as kopers nie hul paaiemente betaal nie.” WesBank probeer nogtans verbruikers tegemoetkom. Mense wie se kontrak verleng kan word en mense wat reeds baie geld terugbetaal het, het die grootste kans om paaiementsgewys te oorleef.

Volgens De Kok word die mark vir gebruikte voertuie baie negatief geraak. In die verlede het mense wat nie nuwe voertuie kan bekostig nie, gebruikte voertuie gekoop. “Ons sien nie nou só ’n dramatiese skuif van die nuwe mark na die gebruikte mark nie. Dit is ’n geval van ’n ooraanbod van gebruikte voertuie en ’n onderaanvraag daarna.”