Só sê die Universiteit van Stellenbosch se Buro van Ekonomiese Ondersoek (BEO), wat sy groeivooruitsigte vir 2009 van 3,8% tot 3% verlaag het.

Dan is die markstemming boonop die laagste in jare volgens TNS Research Surveys.

Die BEO het sy groeivooruitskattings vir 2008 én 2009 afwaarts aangepas. Vir vanjaar word groei van 3,2% verwag, teenoor die 3,4% wat in April in die vooruitsig gestel is.

“Die grootste aanpassing is egter in die vooruitsigte vir 2009,” het mnr. Hugo Pienaar, ekonoom by die BEO, gesê. Terwyl in April nog voorsien is dat die groeikoers teen volgende jaar kan begin herstel, is die sloerende uitwerking van die jongste rentekoersverhogings toe nog nie in berekening gebring nie.

“Die uitwerking daarvan is dat privateverbruiksbesteding en vaste investering volgende jaar selfs swakker as vanjaar kan wees.”

Vroeër is nie verwag dat die Reserwebank in Junie steeds die repokoers sou lig nie.

“Die ekonomie is taamlik pap en die Reserwebank weet dit. Ons voorsien egter nie nog ’n verhoging nie,” het Pienaar gesê.

Gewone landsburgers voel reeds die pyn en hul verwagtinge raak ál negatiewer.

TNS se markstemmingindeks (MSI) het die afgelope kwartaal die verste geval sedert sy ontstaan in 2002.

“Dit is baie ernstig,” het mnr. Neil Higgs, TNS se hoof van innovasie en ontwikkeling, gesê. “Al die vooruitgang van die afgelope vyf jaar is prakties gesproke uitgewis,” het Higgs oor die swakker stemming gesê.

Dié indeks bestaan uit twee komponente: die huidige stemming en die vooruitsigte vir die ses maande wat voorlê.

Gewoonlik is die huidige stemming meer optimisties, en die vooruitsigte swakker, “maar dié keer het die huidige stemming só ver getuimel (met 41 punte) dat ’n mens kan sê die vrese (wat verbruikers oor die toekoms gehad het) is bewaarheid,” meen Higgs.

Kommer oor inflasie is ook die hoogste sedert in 2002 met die indeks begin is.

Prinsloo meen die nuwe gewigte wat Statistieke Suid-Afrika aan die produkte in die verteenwoordigende mandjie gaan toeken, kan die inflasievooruitsigte verbeter. Volgens ’n verklaring deur die BEO kan die nuwe gewigte sorg dat die styging van die verbruikersprysindeks voor einde volgende jaar weer onder 6% – en dus binne die Reserwebank se teiken – sal wees.