Ontleders en bedryfslui is dit eens dat vlootoperateurs nou wag en sien wat met die rentekoers en ekonomie gaan gebeur voordat hulle nuwe voertuie begin aanskaf.

Verkope van nuwe passasiersvoertuie het met 12 408 eenhede, oftewel amper ’n derde, tot 40 395 eenhede getuimel.

Die Nasionale Voertuigvereniging (Naamsa) het gister dié skoksyfers bekend gemaak.

Dié slegte vertoning volg op ’n hele paar maande waar die verkope van voertuie agteruitgeboer het.

Volgens mnr. Dennis Dykes, hoofekonoom van Nedbank, toon die voortslepende afname in voertuigverkope dat hoër rentekoerse die gewenste uitwerking het om verbruiksbesteding aan duur items te verminder.

“Dit, tesame met swak kleinhandelsyfers, stadiger kredietgroei en ander bewyse van swakker (verbruiks-) aktiwiteit, behoort die monetêrebeleidskomitee te oortuig om rentekoerse vir die res van die jaar konstant te hou,” het hy gesê.

Maand-tot-maand-verkope vertoon nie watwonders nie met Augustus se verkope van passasiersvoertuie wat 3,4% laer is as verkope in Julie. Die verkope in die eerste agt maande van die jaar was ook 22% laer as in die ooreenstemmende tydperk verlede jaar.

Die verkope van ligte, medium- en swaar voertuie, wat voorheen die enigste ligpunt in die nuwevoertuig-donkerte was, volg nou in passasiersvoertuie se spore.

Swaar voertuie is die enigste groep wat ’n positiewe verkoopsgroei getoon het. Die groep se verkope het met 4% gegroei.

Totale nuwevoertuig-verkope van maatskappye wat aan Naamsa verslag doen, is 30,3% laer as in Augustus 2007.

Dié verkope moet volgens Naamsa egter in perspektief gesien word aangesien Augustus 2007 met die hoogste maandelikse verkope van die jaar gespog het.

Talle motorverhuringsmaatskappye hernieu hul vlote in Julie en Augustus en daarom is dit tradisioneel ’n maand met hoër verkope.

Die feit dat handelsvoertuie ook nou deurloop, is volgens mnr. Tony Twine, ekonoom by Econometrix, ’n teken dat dit nie meer net die verbruiker is wat die druk van 27 maande se hoër rentekoerse voel nie. Suid-Afrika se ondernemings voel dit ook en groot infrastruktuurontwikkeling bied nie meer die beskerming van vroeër nie.

“Die daling van meer as 30% in algehele voertuigverkope in Augustus dui daarop dat ’n toenemende aantal private sowel as vlootkopers die besluit uitstel om hul huidige voertuie te vervang,” het mnr. Brand Pretorius, voorsitter van McCarthy Motor Holdings, gesê.

“Ons glo dat hul planne om te koop in die wiele gery word deur die voortgesette tekort aan sake- en verbruikersvertroue in Suid-Afrika.”