Die moneterebeleidskomitee (MBK) van die Reserwebank maak Donderdag sy rentekoersbesluit bekend en al verwag die meeste ekonome dat die repokoers vir eers vas gaan staan op 12%, kan die jongste data die prentjie effens bederf.

Mnr. Tito Mboweni, president van die Reserwebank, het met die bekendmaking van die vorige rentekoersbesluit gesê die verwagting is dat inflasie in die komende maande ’n hoogtepunt sal bereik en nader na die einde van die jaar kan begin afplat.

Die verbruiker- en produksie-inflasiesyfers vir Augustus was steeds effens hoër as die verwagting en die volgende maande se statistieke is nodig om te bepaal of inflasie wel aan die afplat is.

Ná ’n week op die wêreldmarkte wat deur baie ontleders as die ergste sedert die begin van die Groot Depressie beskryf word, is die rand veel swakker. Die geldeenheid het Vrydag sy swakste vlak in meer as vyf en ’n half jaar teenoor die dollar bereik. In ’n stadium het die rand op R8,58 teenoor die dollar verhandel.

Volgens mnr. Johan Pyper, ekonoom van Plexus Batebestuur, hou die swakker rand vir Suid-Afrika ’n groot inflasiegevaar in. “Dit strek wyer as net brandstofpryse omdat die land so baie goedere invoer,” het hy gesê. Suid-Afrika se groot tekort op die lopende rekening is ’n bewys daarvan dat die land baie meer verbruik as wat hier geproduseer word.

Die meeste ekonome verwag dat die Reserwebank die rentekoers teen April volgende jaar sal begin verlaag, maar Mboweni het al gesê die MBK wil eers sien dat inflasie wel ’n tyd lank op ’n laer vlak bly.

Die gevaar wat hoër inflasie inhou, is dus nie ’n rentekoersverhoging vandeesweek nie, maar eerder dat die langverwagte verlaging dalk eers later volgende jaar sal wees.

Laer brandstofpryse kan egter in die komende maande inflasievooruitsigte verbeter. Me. Kay Walsh, ekonoom van Rand-Aksepbank, het in ’n verslag gesê as die olieprys verder daal en volhoubaar op $85 bly, kan verbruikersinflasie al teen middel volgende jaar binne die Reserwebank se teiken van tussen 3% en 6% wees.

Die olieprys het die afgelope dae gedaal en Brent-ruolie verhandel in die omgewing van $90 per vat.

Die bekendmaking van die Suid-Afrikaanse Kamer van Koophandel en Nywerheid se sakevertroue-indeks môre sal ook meer lig werp op die land se vooruitsigte die komende maande.