Australië het vroeër vandeesweek skielik aangekondig dat hy die rentekoers met een persentasiepunt verlaag, al is inflasie dáár ver bo die teiken.

Die Bank van Engeland het eergister die koers in Brittanje ook met 0,5 persentasiepunt laat daal. Agt sentrale banke het tot dusver koerse verlaag.

Dié lande vrees ’n resessie en het vir hul verbruikers en sakelui sake vergemaklik deur die koste van skuld te verminder.

“Die monetêrebeleidskomitee (MBK) het nie ’n koersverlaging oorweeg nie,” het mnr. Tito Mboweni, president van die Suid-Afrikaanse Reserwebank, gister in reaksie op ’n vraag gesê.

Die MBK het gister aangekondig dat die repokoers op 12% sal bly te midde van die heersende krisis in die wêreld se vernaamste ekonomieë.

Dit beteken die prima uitleenkoers sal ook vir eers bly staan op 15,5%.

Ekonome het die besluit verwelkom.

Met die risiko van stygende inflasie, is dit die regte besluit, het me. Jaanre Fourie, ekonoom van Metropolitan Batebestuurders, gesê.

Die waarde van die rand het die afgelope handelsdae skerp gedaal namate geld aan ontluikende markte onttrek is weens die likiditeitskrisis in die VSA en Europa. Woensdag het die rand tot R9,44 teenoor die dollar geval, sy laagste vlak sedert laat Oktober 2002. Die geldeenheid het gistermiddag laat weer tot R9,08 verstewig.

’n Rentekoersverlaging kon bygedra het tot die rand se agteruitgang omdat dit die opbrengs op beleggings in Suid-Afrika relatief swakker as elders sou maak.

Die swakker rand hou ’n groot inflasiegevaar vir die land in, het Mboweni gesê.

Dié mening is ook die afgelope week deur verskeie ekonome uitgespreek.

Volgens Mboweni bly inflasievooruitsigte onseker omdat die risikofaktore verander het. In dié stadium is die rand se verswakking ’n ál groter risiko.

Hy is egter optimisties oor die uitwerking wat die dalende olieprys sal hê. Waar die kontantprys vir Brent-ruolie per vat nog middel Julie op $147 was, het dit gistermiddag laat reeds tot $82,28 per vat gesak.

Die land voer benewens brandstof ook baie ander produkte in, veral ter voorbereiding van die Wêreldbeker-sokkertoernooi 2010 waarvoor verskeie infrastruktuurprojekte afgehandel moet word.

In Augustus het die Reserwebank ook die koers onveranderd gehou.

In daardie stadium is beter inflasievooruitsigte – danksy die sterker rand en dalende olieprys asook die hersamestelling van die inflasiemandjie in 2008 – as die vernaamste rede vir die besluit aangevoer.

Mboweni het die vertroue uitgespreek dat Suid-Afrikaanse banke stabiel is en nie aan die subprima-krisis van die VSA blootgestel is nie, berig Reuters. Hy het voorts gesê nog geen Suid-Afrikaanse bank het die Reserwebank om hulp genader nie.