Ryk lande staan op die randjie van ’n resessie en die wêreldekonomie koel erg af.

Só meen die Internasionale Monetêre Fonds (IMF) in sy jongste World Economic Outlook.

Groeivooruitsigte vir die wêreldekonomie in sy geheel is vir vanjaar van 4,1% afwaarts aangepas tot 3,9%. Die IMF meen groei sal volgende jaar net 3% wees, terwyl 3,9% nog luidens sy vorige verslag verwag is.

Lande in die ontwikkelende wêreld kan egter nie te gerus wees nie, meld die verslag, want hulle is nie heeltemal verwyder van die probleem nie. Groei het afgeplat in ontluikende markte sedert die krisis begin het.

Hoewel dit steeds beter gaan as die 1%-groei op ’n jaargrondslag wat ontwikkelde lande sedert die derde kwartaal van verlede jaar ervaar, is veral sommige ontwikkelende lande kwesbaar.

Suid-Afrika het die kenmerke van die lande wat die IMF meen swaar deur die finansiële krisis getref kan word.

Die yler stroompie portefeuljebeleggings wat die land binnevloei en die probleme wat dit vir die finansiering van die tekort op die lopende rekening inhou, tel onder die grootste struikelblokke wat die IMF uitlig.

Volgens die organisasie is die ekonomieë wat die sterkste handelsbande met die VSA en Europa het, ook vatbaar vir die gevolge van ’n swakker vraag wanneer dié streke in ’n resessie verval. Suid-Afrika se twee grootste handelsvennote is die Europese Unie en die VSA.