Die vlootbestuurs- en inligtingstegnologie-onderneming DigiCore het in die boekjaar tot 30 Junie sy eie voorspelling van 'n omset van R300 miljoen met R8 miljoen oortref.
Dit is 'n toename van 217% op die R97,3 miljoen wat in die vorige jaar aangeteken is.
Die bedryfswins het tot R35 miljoen geklim van die R3,8 miljoen in die vorige boekjaar af.
Die netto finansieringskoste het in dieselfde tyd gedaal soos die groep se kontantposisie met R32,5 miljoen verbeter het.
Die resultate weerspieël die suksesvolle voltooiing in Februarie vanjaar van fase 1 van die vyfjaar-debisvlootbestuurskontrak van sowat R150 miljoen.
Fase 2 word tans uitgevoer wat 'n stewige inkomstevloei beteken as gevolg van die installering van C-Trackeenhede in die uitgekontrakteerde Telkom-vloot.
Die wesensverdienste per aandeel het van 0,46c tot 10,82c gestyg. Geen dividend is verklaar nie.
Mnr. Nick Vlok, uitvoerende adjunk-voorsitter van DigiCore, het gesê dit is die onderneming se kerndoelwit om die land se voorste verskaffer van vlootbestuursdienste te word.
"Die resultate is besonder verblydend as die swak verbruikersvraag in die ekonomie in ag geneem word. Die toename in die petrolprys sowel as oorkapasiteit in die mark weens lae vervoerkoste het die situasie vererger," het Vlok gesê.
DigiCore was in staat om sy markaandeel in 'n mededingende bedryf te behou. Dit is moontlik gemaak deur bedrywighede stroombelyn te maak en met groter gebruikerstevredenheid.
Die intellektuele en handelsnaamwaarde van die groep is gedurende die jaar onafhanklik gewaardeer op R181 miljoen.
Rand/£: 16.1200
Goud $/ons: 847.40
Vind jou ou
