Die waarde van ’n onderneming word deur ’n groot aantal faktore beïnvloed.

Dit sluit onder meer in die vaardighede van sy bestuur, langtermyn-inkomstestrome, unieke produkte en tegnologie, en produkverskeidenheid. As ’n sake?eienaar ’n uittrede-gereedheidstrategie het, kan hy betyds en stelselmatig aandag aan hierdie faktore skenk om sodoende sy onderneming se waarde te verhoog.

Een van die belangrikste faktore wat aandag in ’n behoorlike uittrede-gereedheidstrategie behoort te geniet, is ’n praktiese groeiplan vir die onderneming. Hoewel groei op verskillende maniere gemeet kan word, is groei in winste waarskynlik die belangrikste maatstaf omdat winsgebaseerde waardasiemetodes die algemeenste gebruik word om ’n onderneming te waardeer.

Op sy eenvoudigste gestel, kan die winste van ’n onderneming slegs groei as een van die volgende plaasvind:

) Die uitgawes neem af terwyl die inkomste dieselfde bly of met minder afneem as die uitgawes.

) Die inkomste neem toe terwyl die uitgawes dieselfde bly of toeneem met minder as die inkomste.

) Die inkomste neem toe terwyl die uitgawes afneem. Dié moontlikheid is die ideale situasie mits dit nie op ’n kortsigtige wyse bereik word wat langtermynprobleme skep vir die onderneming nie.

Aan die uitgawe-kant is daar by baie ondernemings die geleentheid om met relatief min moeite aansienlike koste te bespaar.

Aspekte wat hier ter sprake kom, sluit in die koste van verkope deur bestaande aankope en verskaffers te ontleed, telefoon- en ander kommunikasie-uitgawes, voertuigkoste, versekering- en finansieringskoste, voorraad-verliese en personeel-uitgawes.

Op sy beurt kan die inkomste van ’n onderneming op een of meer van die volgende vyf wyses (die inkomste-drywers) verhoog word: die aantal verkoopsleidrade, die koers waarteen die onderneming daarin slaag om die leidrade te omskep in nuwe kliënte, die aantal aktiewe bestaande kliënte, die gemiddelde waarde per transaksie en die getal transaksies per kliënt.

’n Relatief klein verbetering in elkeen van die inkomste-drywers kan lei tot ’n aansienlike toename in ondernemingsinkomste (en derhalwe sy waarde). ’n Onderneming ontvang byvoorbeeld 2 000 verkoopsleidrade per jaar en omskep 60% in nuwe kliënte.

Die onderneming het 1 000 aktiewe bestaande kliënte. Nuwe en bestaande kliënte koop gemiddeld een keer per jaar van die onderneming teen ’n gemiddelde waarde per transaksie van R5 000 (inkomste R11 miljoen). ’n Toename van slegs 10% in elkeen van die inkomste-drywers het ’n toename van 40% (R4,5 miljoen) in ondernemingsinkomste tot gevolg.

’n Praktiese groeiplan wat deel uitmaak van ’n uittrede-gereedheidstrategie gee aandag aan onder meer watter ander markte ontgin kan word; watter ander produkte aan kliënte verskaf kan word; watter bestaande marksegmente die grootste groei-potensiaal het en waar die beste winsmarges beskikbaar is, met inagneming van die teikenmark en bestaande produkte; asook of strategiese of kruisbemarking-ooreenkomste met ander verskaffers aangegaan kan word.

Die belangrike punt is egter dat winsgroei eers werklik ’n positiewe impak op die uiteindelike waarde van die onderneming het as dit duidelik is dat die groei konstant was in die verlede en volhoubaar is in die toekoms.

Al is die prestasie van die ver?lede geen waarborg vir ’n soortgelyke prestasie in die toekoms nie, gee ’n geskiedenis van konstante jaarlikse groei geloofwaardigheid aan huidige en geprojekteerde inkomstesyfers, wat ’n waardasie positief beïnvloed.

) Du Plooy is ’n sake-konsultant en eienaar van die webwerf http://www.exitreadiness.co.za.