Daar is min meubelvervaardigers wat voorsiening maak vir hierdie tekort aan ruimte – nie net in meenthuise nie, maar ook in huise en woonstelle.

Dit het mnr. Lodie de Jager, ’n Bloemfonteinse skrynwerker, aan die dink gesit oor maniere om meer pakplek in so ’n klein ruimte te probeer skep.

Die plan wat hy prakseer, en uiteindelik saam met sy vennoot, mnr. Johan du Plessis, gepatenteer het, is sover hulle kon vasstel, uniek in Suid-Afrika en die wêreld.

Hulle het ’n kas ontwerp wat in die dak gebêre word en met die druk van ’n afstandbeheer-knoppie laat sak en opgehys word.

“Agterna het die oplossing so eenvoudig gelyk, maar dit het baie kopkrap en die bou van verskeie modelle gekos om die praktiese probleme uit te stryk,” sê De Jager.

Die patent moes stofdig, veilig en eenvoudig wees. Met die hulp van ’n Kroonstadse modelgieter is ’n gietvorm vir ’n stewige omhulsel van plastiek geskep. Dié omhulsel rus op die dakbalke, met die houtkas wat binne-in pas. Die kas se onderkant kry dieselfde afwerking as die plafon. ’n Opening word in die plafon gesny waardeur die kas met die hulp van ’n elektriese motor en kabels laat sak word.

Die omhulsel word met verstelbare boute aan die dakbalke geanker sodat die kas gelyk met die plafon geïnstalleer word. ’n Veiligheidskakelaar laat die elektrisiteit uitsny in geval van oorlading en die kabels is deeglik getoets om die gewig van die kas te dra.

Nie tevrede om net ’n kas uit die dak te laat sak nie, het De Jager ook ’n lessenaar en kroegtoonbank ontwerp wat in die dak gebêre kan word.

Die meubelstukke vou inmekaar wanneer dit opgehys word en pas presies in die omhulsel in. Op die vloer rus hulle op ’n voetstuk.

Om ’n kroegtoonbank in die lug te sien oopvou, kompleet met glase en bottels, laat ’n mens nogal wonder of jy nie dalk per ongeluk op ’n James Bond-rolprentstel beland het nie.

Of dalk reeds ’n stywe dop agter die blad het nie.

Hulle glo daar is ’n nis in die mark vir hul produk en dink aan moontlike gebruike in kantore waar dokumente geberg word of in motorhuise waar daar nie altyd plek vir gereedskap is nie.

In vakansiehuise bied dit ook veilige bêreplek vir waardevolle artikels wat ’n mens nie wil laat rondlê as jy weggaan nie.

De Jager en Du Plessis se sakeplan is om landwyd in groter sentra agentskappe te verkoop wat die eienaars van die agentskap die alleenreg gee om die patent, Ceiling Cupboards, in daardie stad of dorp te verkoop en te installeer.

De Jager en Du Plessis verskaf opleiding met installasie en ’n verbintenis om voorraad te verskaf wanneer dit benodig word.

“Ons het eers daaraan gedink om ’n fabriek op te rig en self ons produk landwyd te vervoer en verkoop – maar met die agentskap-model skep ’n mens heelwat meer werk- en sakegeleenthede vir ander entrepreneurs terwyl ons al ons aandag op die ontwikkeling van die produk kan toespits,” sê Du Plessis.

’n Bloemfonteinse sakeman het reeds die alleenreg vir die Bloemfonteinse agentskappe opgeraap en die twee entrepreneurs hoop dat ontwikkelaars van nuwe meenthuiskomplekse een of meer van die ontwerpe in nuutgeboude eenhede sal installeer en só waarde toevoeg.

Die bevrediging wat ’n mens smaak om jou idee ’n werklikheid te maak, is die heel lekkerste van so ’n projek, sê De Jager.

“ ’n Mens dink nagte om soos jy praktiese probleme probeer uitstryk.

“Agterna kan jy nie glo hoe eenvoudig die oplossing was nie en dat niemand anders nog ooit daaraan gedink het nie.”