’n Gebrek aan welwillendheidsbeleggers (sg. angels) in Suid-Afrika ondermyn die begin en groei van innoverende ondernemings wat mettertyd in baanbrekermaatskappye kon ontwikkel.

Me. Julia Long, uitvoerende hoof van Mark Shuttleworth se HBD-waagkapitaalgroep, definieer ’n welwillendheidsbelegger as ’n vermoënde individu wat passievol oor ’n bepaalde bedryf is en by ’n nuwe projek betrokke wil raak.

So ’n persoon sal dan ’n kapitale belegging maak en moontlik ook tyd afstaan en kundigheid aan die nuwe onderneming verleen.

In ruil sal die belegger ’n aandeel in die onderneming ontvang, wat impliseer hy is bereid om sy geld te verloor indien die onderneming nie die paal haal nie.

Waarskynlik die bekendste voorbeeld waar entrepreneurs danksy ’n welwillendheidsbelegger hul innoverende idee in ’n suksesvolle onderneming kon ontwikkel, is die $100 000 tjek wat mnre. Larry Page en Sergey Brin, stigter van die web-soekenjin Google, van mnr. Andy Bechtolsheim, ’n stigter van Sun Micro­systems, ontvang het.

“In markte soos die Verenigde Koninkryk is daar gevestigde welwillendheidsnetwerke,” sê Long. Entrepreneurs kan dié netwerke met hul idees nader, waar die beleggers reeds vooraf aangedui het in watter tipe belegging hulle sal belangstel.

“In Suid-Afrika sal ’n entrepreneur sukkel om so ’n belegger te vind, want hoe sal ’n mens weet wie jy kan nader,” sê Long.

Volgens haar is daar genoeg individue in Suid-Afrika met “spaar-miljoene”, maar die meeste van hulle is waarskynlik nie bewus van hierdie beleggingsmoontlikheid nie.