Keith Levenstein
Ons kliënte-ondersteuningsentrum het op ’n dag ’n oproep van die eienaar van ’n klein sakeonderneming ontvang. Hy het probeer om ’n faktuur met ons rekeningkundige programmatuur te skep, maar het gesukkel.
Hy was nóg rekenaargeletterd nóg vertroud met die programmatuur en het die oproepkonsultant lank besig gehou.
Later het dit aan die lig gekom dat sy rekeningkundige amptenaar van die afgelope 12 jaar, wat sy hele onderneming laat funksioneer het, die vorige dag bedank en geloop het.
Spring in en swem
Hoe gereeld gebeur dit nie? Die eienaar van dié onderneming is kop eerste aan die diep kant van die swembad ingegooi.
Hy is ’n ingenieur en het al sy administratiewe en finansiële verantwoordelikhede aan sy rekeningkundige amptenaar gedelegeer.
Rekeninge is nie deur hom nagegaan nie en belastingsake was nie onder sy beheer nie.
Om die waarheid te sê, het hy ál die onderneming se administratiewe verantwoordelikhede, selfs die behandeling van kliënte, as ’n struikelblok beskou vir dít wat hy die meeste geniet het – om ’n ingenieur te wees.
Die res was sy rekeningkundige beampte se werk.
Maar die oomblik toe sy die pad gevat het, moes die eienaar inspring om telefone te antwoord, bestellings te neem, bemarking te doen, en verkope te reël. Ván die oproepe wat hy beantwoord het, was van krediteure wat volgehou het dat hulle maande lank nie betaal is nie.
Betaal rekeninge voor die voet
“Waarom is dit nie betaal nie?” het hy hom afgevra en ten einde die onderneming vernedering te spaar, het hy links en regs rekeninge begin betaal – hetsy dit reg was of nie.
Selfs sy onderneming se internet-bankprofiel was in sy voormalige werknemer se naam geregistreer. Ten einde dit te verander, moes die eienaar die bank se oproepsentrum verskeie kere kontak, wat uiters tydrowend was.
Uiteindelik het die man ons gekontak om sy rekeningkundige verantwoordelikhede oor te neem.
Daarop het ons hom geadviseer om soveel moontlik kennis van sy onderneming se boeke op te doen ten einde te verstaan wat ons vir hom gaan doen, sodat hy te alle tye beheer oor sy administrasie kan hê.
Op die ou einde is dit sý besigheid, nie ons s’n nie.
Levenstein is die uitvoerende hoof van EconoServ, ’n konsultantfirma wat spesialiseer in rekeningkunde en swart ekonomiese bemagtiging.
