André Janse van Vuuren
“Wanneer ons klaar is, gaan jy my vra waar jy een kan oopmaak,” sê ’n selfversekerde mnr. Hein Scheffer wanneer hy hom aan die begin van dié onderhoud voorstel.
Scheffer staan aan die hoof van Auto Magic, ’n franchise-ketting van paneelkloppers wat op die herstelwerk ná bufferbotsings en minder ernstige ongelukke fokus.
Wat hom van sy mededingers onderskei, sê Scheffer, is dat dié paneelklopwinkels “veilig, skoon en netjies genoeg (is) vir enige ma, dogter en vrou om soontoe te gaan”.
Met die dat Auto Magic ook net op minder ernstige ongelukke fokus, is die wagtydperke vir herstelwerk aansienlik korter – iets wat kliënte en versekeraars goed pas.
Scheffer het Auto Magic in 1997 in Benoni begin en in 2002 besluit om die franchise-roete te volg. Tans het die groep 23 winkels, terwyl die franchise-ooreenkomste vir nog 14 reeds aangegaan is.
Vir hierdie groei, en die volhoubare sukses wat die franchise-nemers tot dusver getoon het, is Auto Magic verlede maand as ’n finalis in die nuweling-franchise-kategorie vir die jaarlikse toekennings van die Franchise-vereniging van Suider-Afrika benoem.
Nis raakgesien
Scheffer se kennis van geleenthede in die na-verkope-mark vir voertuie strek terug tot die vroeë 1980’s. Toe het hy ’n ander franchise-kettinggroep, Novus, begin wat motoriste se beskadigde windskerms herstel het.
Later, in die 1990’s, is dié onderneming deur een van die huidige groot motorglas-instansies oorgeneem.
Scheffer het nietemin in sy daaglikse sake met versekeraars én paneelkloppers drie aspekte van dié bedryf geleer wat later die grondslag van sy nuwe sake-idee was.
In die eerste plek het hy opgemerk bufferbotsings en minder ernstige ongelukke maak nagenoeg 70% van alle eise van versekeraars uit.
Tweedens het hy opgemerk herstelwerk aan voertuie vir dié tipe ongelukke neem veel langer as wat nodig is, omdat paneelkloppers meestal op ’n eerste-in-eerste-uit-grondslag hul kliënte se motors herstel. Die eienaars van motors wat minder ernstige skade opgedoen het, moes dus wag vir motors wat grootskaalse herstelwerk nodig gehad het.
In die derde plek het hy opgemerk die meeste paneelkloppers is in nywerheidsgebiede en gee in die meeste gevalle nie noemenswaardige aandag aan die estetiese voorkoms van hul werkwinkels nie.
“Ons model bied ons kliënte ’n handvol alternatiewe,” sê Scheffer. “Die meeste van ons winkels gaan jy eerder naby ’n winkelsentrum kry as in ’n nywerheidsgebied.
“Ons werkwinkels is ook veilig, skoon en netjies genoeg vir enige vrou. Jy sal nie oor ’n spul oliekolle en ou motoronderdele hoef te trap om by jou motor uit te kom nie.”
Voorts sê Scheffer hul vinniger diens vind byval by versekeraars omdat dié nie vir ’n onnodige lang tydperk ’n motor namens die kliënt hoef te huur nie.
Ook, omdat alle rekords van herstelwerk en koste van die werkwinkels na Auto Magic se hoofkantoor gestuur word, kan versekeraars hul oudits vir herstelwerk by al die takke vanaf ’n sentrale punt doen.
As ’n gesoute sakeman laat Scheffer niks aan die noodlot oor nie. Alle aspekte van die onderneming word noukeurig nagevors. Daarby gee Scheffer nie om om vir deskundigheid te betaal in sakegebiede waar hy nie die nodige kennis en ervaring het nie.
Hy sal byvoorbeeld uitgekontrakteerde lewensvatbaarheidstudies doen van persele waar ’n beoogde tak ingerig kan word.
Nadat hy ’n dag of wat saam met ’n voornemende franchise-nemer en dié persoon se eggenoot deurgebring het, moet die kandidaat ’n psigometriese toets ondergaan waar die goeie en swak punte van die persoon deeglik uitgewys word.
Scheffer hou ook nie van aannames nie. Alle syfers omtrent Auto Magic word weergegee as ’n deeglik berekende stuk statistiek: byvoorbeeld, die gemiddelde tydperk wat ’n kliënt se motor in ’n Auto Magic-werkwinkel deurbring is 2,8 dae; die gemiddelde koste van herstelwerk is R3 000 (onderdele uitgesluit); verlede jaar is 28 000 kliënte se motors in Auto Magic-werkwinkels herstel, ens.
Franchise-ooreenkoms
Die koste om die regte vir ’n Auto Magic-werkwinkel te bekom, en dit toe te rus, beloop R1,5 miljoen. Die franchise-nemer se eie bydrae, voor finansiering, moet ten minste R500 000 wees. Die maandelikse franchisetarief beloop 7,5%. Franchise-nemers word nie voorgesê waar om hul verbruikersgoedere aan te koop nie; slegs die spesifikasies van produkte word voorgeskryf.
Scheffer verkies om nie ooreenkomste met franchise-nemer-beleggers aan te gaan nie, maar met franchise-nemers wat die werkwinkel self sal bedryf.
Volgens hom het die meerderheid van sy franchise-nemers geen vorige ondervinding in die paneelklopbedryf nie.
“So, wanneer gaan jy jou eie Auto Magic oopmaak?” vra hy aan die einde van die onderhoud.
Nie ’n slegte opsie wanneer skryfwerk die dag vervelig raak nie.
andre.jvvuuren@sake24.com
