“Ek myn, maar ek voer ook pasteie na Engeland toe uit.”

Só het mnr. Ndaba Ntsele, uitvoerende hoof van Pamodzi Investment Holdings, gesê oor die diverse belange wat entrepreneurs kan besig hou.

Hy het gepraat by die bekendstelling van Ernst & Young (E&Y) se wêreldentrepreneurskompetisie vir 2008.

Ntsele is verlede jaar as die wenner van die Suid-Afrikaanse been van hierdie kompetisie aangewys, en vertrek binne minder as twee weke na Monte Carlo waar hy die kans staan om uit die wenners van 42 lande die wêreldtitel te verower.

Sake-hoogtepunte in Ndaba se entrepreneuriese loopbaan sluit in die oorname van Foodcorp en die samesmelting van Pamodzi se Prestasi met Thebe-versekeringsdienste, waardeur die korttermyn-versekeringsreus Indwe Risk Services tot stand gekom het.

Me. Zanele Xaba, E&Y-direkteur, sê die kompetisie het ten doel om erkenning te gee aan die uitsonderlike prestasies van Suid-Afrikaanse entrepreneurs en die rol wat hulle speel om werkgeleenthede te skep en die ekonomie te help groei.

Vorige wenners sluit in mnr. Koos Bekker, uitvoerende hoof van Naspers, en mnr. Bill Lynch, voormalige hoof van Imperial Holdings, wat die wêreldtoekenning twee jaar gelede gekry het. Lynch is verlede jaar oorlede.

Benoemings vir vanjaar se kompetisie sluit op 30 Junie.

Bo en behalwe vir die hoofkategorie, word benoemings ook ingewag van opkomende entrepreneurs en maatskaplike entrepreneurs.

Mnr. Pat Dickens, hoof van Centurion Systems, het verlede jaar met die louere as opkomende entrepreneur weggestap, terwyl mnr. Taffy Adler van Johannesburg Housing Company die maatskaplike kategorie gewen het.

Ten einde in die afdeling vir opkomende entrepreneurs in aanmerking te kom, moet ’n benoemde die stigter, of eienaar van ’n maatskappy wees wat ten minste twee jaar reeds sake doen en ’n minimum omset van R20 miljoen per jaar toon.

In die afdeling vir die voorste maatskaplike entrepreneurs, neem die beoordelaars kwessies rakende ’n ondernemer se rol in onder meer regstreekse maatskaplike ontwikkeling en innovasie in ag.