Seoel. – Noudat die wedloop tussen HD DVD en Blu-ray verby is, verwag Samsung dat die wêreldwye vraag na Blu-ray-toestelle oor die volgende vyf jaar die hoogte in sal skiet.
Hierdie volgende generasie van digitale tegnologie kan hoë-definisiebeelde lewer asook meer inligting stoor as gewone DVDs.
Mnr. Jun Dong-soo, hoof van Samsung se sakeafdeling: digitaal oudiovisueel, sê hy verwag dat die wêreldwye mark na Blu-ray jaarliks tot 2012 met ten minste 80% sal groei.
Hy sê daar sal vanjaar waarskynlik vyf miljoen Blu-ray-toestelle verkoop word – ’n verdriedubbeling teenoor verlede jaar se verkope. In 2012 verwag hy wêreldwye verkope van 51 miljoen toestelle.
Die stryd tussen hoë-definisievideoformate het in Februarie tot ’n einde gekom toe die Japanse maatskappy Toshiba, wat HD DVD-tegnologie ontwikkel het, aangekondig het dat hy dié formaat gaan los.
Die mededingende Blu-ray-formaat word gesteun deur Sony, Matsushita en vyf groot Hollywoodse rolprent-ateljees.
In 2006 was Samsung die eerste maatskappy wat ’n Blu-ray-videotoestel verkoop het. –
Rand/£: 15.1800
Vind jou ou
