Ook Nokia Siemens Networks (NSN), ’n verskaffer van kommunikasie-infrastruktuur wêreldwyd, moet sulke uitdagings die hoof bied.

Die groep het byvoorbeeld vir die Olimpiese Spele later vanjaar in Bejing ’n energiedoeltreffende netwerk of “groenverbinding” geskep om China Mobile Group Beijing, die amptelike telekommunikasieverskaffer van die Spele, by te staan om die miljoene besoekers met die res van die wêreld op ’n energiedoeltreffende manier te verbind.

Siemens Networks en die Nokia Networks Business-groep het in Junie 2006 saamgesmelt in die gesamentlike onderneming NSN. Die groep se kliënte in Suider-Afrika sluit Vodacom, Cell C, Neotel en Telecom Namibia in.

Volgens me. Linda Khumalo, hoof van die groep se substreek vir Suider-Afrika, werk NSN tans met sy kliënte saam om ook die uitdagings van die Wêreldbeker-sokkertoernooi in 2010 wat in Suid-Afrika plaasvind, beter te verstaan en begin hulle nou reeds beplan.

“Soos ons met die Beijing Olimpiese Spele gedoen het, sal die amptelike telekommunikasie-verskaffer vir die 2010-toernooi ’n manier moet vind om koste te bespaar en kragverbruik te verminder,” het sy gesê.

Dit is nou sowat ’n jaar sedert die groep saamgesmelt het.

Khumalo sê ná die afgelope jaar vir NSN in Suider-Afrika: “Ons sal aanhou om die plaaslike skip kragtig te stuur ondanks sekere uitdagings. Ons vier ook dat ons in die afgelope jaar ons sake met al die operateurs in Suid-Afrika volgehou het.”

Die groep het in dié tyd sy eerste fase van ’n transaksie vir swart ekonomiese bemagtiging (SEB) voltooi. Volgens Khumalo steek dit sy kliënte se verwagtinge verby. Die groep het ook in dié tyd R10 miljoen bestee aan die opleiding van subkontrakteurs van SEB-maatskappye.

NSN beplan om die komende jaar op eenvoudiger netwerk-argitektuur te fokus om operateurs te help om hul ondernemings te transformeer.