Microsoft se nuutste rekenaar-toetsbord, die Natural Ergonomic Keyboard 4000, lyk of dit tuis hoort in ’n ruimteskip.

Om gewoond te raak aan die vreemde vorm (dié toetsbord is nie plat soos die meeste ander toetsborde nie, maar het ’n boepens wat die letters in die middel skei) is soos om van ’n kar met ’n ratkas oor te skakel na ’n outomatiese een. Dit vat ’n rukkie om by te kom, maar gou-gou wonder jy hoe jy ooit daarsonder klaargekom het.

Met kortpad-knoppies op die toetsbord wat jou onmiddellike toegang bied tot handige funksies soos ’n rekenaar se sakrekenaarfunksie, maak die 4000-produk jou lewe aansienlik makliker. Verskeie van die kortpad-knoppies maak ook die gebruik van die internet vinniger en makliker.

Die grootste nadeel is waarskynlik dat mense wat nog moet kyk na hul hande wanneer hulle tik, dit moeiliker sal vind om die toetsbord te gebruik.

Die vreemde posisie van die knoppies op die toetsbord vat ’n rukkie om aan gewoond te raak.

Vir diegene wat egter gemaklik tik sonder om na hul hande te kyk, voel dit of die toetsbord omtrent rondom jou hande gebou is.

Die bykomende voordeel is dat die vorm van die toetsbord beter ondersteuning bied vir ’n gebruiker se postuur.

Die produk is deel van die nommer-1-toets?bord?produk?reeks in Europa en kan gebruik word met Windows- sowel as Mac-bedryfstelsels.