Die nuutste aflewering in die omstrede Grand Theft Auto-reeks-videospeletjies is gister wêreldwyd bekend gestel en sal na raming sowat $400 miljoen in sy eerste week van verkope bereik.

Grand Theft Auto IV (GTA IV) se voorgangers is wyd deur politici en belangegroepe gekritiseer weens die brute geweld daarin. Die speler word die keuse gelaat om polisiebeamptes en prostitute aan te rand of selfs te vermoor.

Sen. Hillary Clinton het voorheen gesê “die ontstellende inhoud in Grand Theft Auto en ander soortgelyke speletjies ontneem ons kinders hul onskuld”.

Die videospeletjiebedryf voer egter aan dat GTA IV ’n ouderdomsbeperking van 18 het en dat dit nie veronderstel is om deur kinders gespeel te word nie. “Die speletjie bevat volwasse inhoud en is vir dié mark bestem,” sê mnr. John Press, produkbestuurder vir Xbox by Microsoft SA.

Volgens mnr. Devon Stanton, bemarkingsbestuurder by Megarom, die Suid-Afrikaanse verspreider van GTA IV, het hulle geen voorraad oor om aan kleinhandelaars te verskaf nie. “Dit is ontsettend gewild. Mense koop twee of selfs drie daarvan,” sê hy.

GTA IV volg die storie van Niko Bellic, ’n Oos-Europese immigrant na die VSA, wat by georganiseerde misdaad betrokke raak. Die speler kan voertuie kaap, dronk bestuur en onskuldige omstanders vermoor. Die speletjie is reeds deur verskeie bedryfspublikasies as ’n donker “meesterstuk” geprys wat soortgelyk is aan flieks deur Francis Ford Coppola en Martin Scorcese.

Volgens kenners in die bedryf sal GTA IV vandeesweek sowat 10 miljoen eenhede wêreldwyd verkoop en sowat $400 miljoen maak.