Albei dié selfone behoort aan die N-reeks van Nokia. Dié reeks is gemik op verbruikers wat soveel moontlik eienskappe in hul selfone wil hê.

Die eienskappe wat die N-reeks het, sluit in beter as gewone kameras, video en musiek-terugspeelvermoëns, sowel as internetvermoëns.

Nokia het verlede week die eienskappe van dié spesifieke twee toestelle, die Nokia N96 en die Nokia N78, in Johannesburg onthul.

Volgens mnr. Henri Mattila, verkoopshoof van Nokia se N-reeks in die Midde-Ooste en Afrika, is dié fone baie vermaaklik en bedoel vir verbruikers wat hul selfone vir verskeie funksies wil gebruik buiten bel.

Nokia noem sy N96-foon ’n “multimedia-rekenaar wat spesiaal aangepas is vir die kyk van video’s”. Die toestel het ’n groot skerm (7,1 cm) en interne geheue van 16 gigagrepe (GB). Dít is genoeg geheue om soveel as 40 uur se flieks of 12 000 liedjies te stoor.

Die selfoon kom met ’n 5 megapixel-kamera en ’n ingeboude GPS-stelsel. Die toestel het ook ’n ingeboude staandertjie spesiaal vir die kyk van flieks.

Die N96 behoort teen Oktober vanjaar in Suid-Afrika te arriveer.

Die N78-foon word deur Nokia beskryf as ’n “multimedia-rekenaar wat musiek, navigasie en fotografie kombineer met die voordele van mobiliteit”.

Dié foon kom met ’n ingeboude GPS-stelsel, ’n 3,2 megapixel-kamera en 8 GB-geheue. Die foon se batterylewe is sterk genoeg om 24 uur lank musiek te speel voordat dit herlaai hoef te word.

Wat dié foon egter besonders maak, is sy FM-versender. Daarmee kan ’n verbruiker sy musiek op ’n ongebruikte FM-kanaal uitsaai in ’n omtrek van 5 m. Met dié eienskap kan die gebruiker van die N78 sy musiek saam met ’n vriend luister deur dit van sy foon uit te saai na sy vriend se selfoon, mits dié ook FM-vermoë het. Albei kan dan deur hul eie oorfone na dieselfde liedjie, wat deur die een foon uitgesaai word, luister.

Die N78 behoort voor die einde van vanjaar in Suid-Afrika beskikbaar te wees.

Teken in op Beeld, Die Burger of Volksblad om jou Sake24 elke dag te kry