Die era van telekonferensies vir ondernemings het aangebreek.

Eerstens omdat die ervaring deesdae uiters naby aan die realiteit kan wees en tweedens omdat ondernemings se bewustheid van kostebesparing en omgewingsbewaring baie opgeskerp het in ’n ekonomiese onstuimige tyd.

’n Telekonferensie is tipies wanneer twee of meer partye, wat geografies ver van mekaar sit, ’n gesprek voer deur telekommunikasie-toerusting. Sommige toerusting werk net met klank en wanneer beelde van die pratende partye ingesluit word, is dit ’n videokonferensie.

Die multinasionale tegnologiegroep Cisco se Suid-Afrikaanse afdeling het tydens ’n geleentheid verlede week in Johannesburg aan die media gedemonstreer hoe sy telekommunikasie-produk, Cisco TelePresence, werk.

“Dit is met teensin wat ek óns telekonferensies met videokonferensies vergelyk. Die Telepresence-ervaring is heeltemal anders,” het mnr. Kumaran Nair, direkteur van bedrywighede vir Cisco Suid-Afrika, gesê.

Cisco se sisteem is besonder omdat dit in ’n beheerde omgewing is – in dié geval in spesifieke vertrekke in die maatskappy se onderskeie takke. In só ’n vertrek is daar klank-, kamera- en internettoerusting. Die mure moet ’n spesifieke kleur geverf wees en die meubels moet eenvormig wees sodat die hele maatskappy se vertrekke eenvormig lyk.

Twee of meer sulke identiese vertrekke word deur ’n breëband-verbinding, in dié geval ’n internetprotokol-foon, verbind en só word ’n virtuele raadsaal geskep.

Die virtuele raadsaal lyk realisties omdat die twee vertrekke só identies is: van die beligting tot die kleur van die houttafel en die vorm van die stoele.

Die sisteem is ook só ontwikkel dat dit baie gebruikersvriendelik is – ’n afspraak word per e-pos gemaak en die sisteem skakel met die druk van ’n knoppie oor na die ander party. “Die ervaring is baie ná aan die realiteit. Dit is asof almal om een tafel sit – al is julle in verskillende lande,” het hy gesê. Nair sê die vertrek in Cisco se Johannesburg-kantoor is van vroeg tot laat voltyds uitgeboek.

“In Suid-Afrika is breëband-internet nog ’n probleem, maar ons het alreeds een stelsel hier verkoop en drie geriewe aan die president geskenk.” Hy sê sodra breëband-internet hier verbeter, behoort telekonferensies ook hier in groter aanvraag te wees.

) Cisco het intern reeds 229 geriewe in 108 stede ter wêreld.

) Die sowat 17 339 vergaderings wat al gehou is, het die groep reiskoste ter waarde van sowat $165 miljoen (sowat R1,2 miljard) bespaar. Boonop is die aarde van die kweekhuisgasse wat met reis gepaardgaan, gespaar.

) In Desember 2007 het Cisco ’n mylpaal van 100 kliënte vir dié stelsel in meer as 40 lande bereik waaronder Verizon, Procter & Gamble en SAP.