Suid-Afrikaanse beleggers kan nou blootstelling kry aan die beleggingsoordeel van die derde rykste mens ter wêreld.

PSG Online het onlangs ’n buitelandse aandeelgekoppelde instrument (FEi) bekend gestel waardeur beleggers regstreeks op buitelandse aandelebeurse soos dié van New York, Londen en Tokio kan belê.

Beleggers sal in van die wêreld se grootste maatskappye kan belê, selfs mnr. Warren Buffett se Berk?shire Hathaway.

Volgens mnr. Corrie du Bruyn, uitvoerende hoof van PSG Online, is die instrument ontwikkel met gewone mense in gedagte en kan dit benut word deur bloot PSG Online se webwerf te besoek.

Beleggers hoef ook nie hul buitelandse beleggingstoelaag te gebruik om hierin te belê nie aangesien PSG Online sy toelaag, wat tans ’n kapasiteit van R1,2 miljard het, vir dié doel gebruik.

Volgens Du Bruyn word ’n minimum belegging van sowat R100 000 vereis om die FEi-instrument te gebruik, maar dit is net om die belegging “noemenswaardig” te maak aangesien dit na Amerikaanse dollar of Britse pond omgeskakel moet word.

Volgens mnr. John Vorster, direkteur van aanlynverhandeling van PSG Online, sal beleggers die voordeel hê van ’n baie likiede beleggingsinstrument.

Hulle kan hul beleggings in dié instrument enige tyd realiseer en uitbetaling sal dan binne vyf dae geskied.

Beleggers kry toegang tot ’n verskeidenheid produkte deur een platform en kan enige tyd ’n aandelebelegging na ’n ander buitelandse aandeel, effektetrust, regeringsobligasie of korporatiewe effekte of geldmarkfondse oorskakel.

Vorster sê die webwerf waarop die FEi-instrument verhandel, verskaf ook nuushooftrekke, mark?verslae wat drie maal per dag bygewerk word, tegniese ontledings, ’n weeklikse nuusbrief en pro?grammatuur vir tegniese ontleding.

“Dié inligting is alles deel van een gekonsolideerde aansig van die webwerf wat verwysing en toegang maklik maak,” sê hy.

’n Verdere fokusgebied van PSG Online se verhandelingsplatform is die aanlyn-opleiding van beleggers deur ’n stap-vir-stap-aanlyngids. Opleiding word verskaf oor die aandelemark, fundamentele en tegniese ontleding en portefeuljebeplanning.

Volgens Vorster word geen aanvangsgelde op beleggings in die FEi gehef nie.

Die makelaarsgelde is 0,5% en ’n verdere 0,5% word gehef wanneer ’n belegger sy belegging verkoop of oorskakel.

Die jaarlikse gelde bedra 1,25%.