Die “baba” van die JSE, die AltX, spog reeds met vyf genoteerde maatskappye met ’n markwaarde van meer as R1 miljard elk.

Dit sluit in Blue Financial Services (finansiëledienstebedryf), Vox Telecom (telekommunikasiebedryf), Esor (konstruksiebedryf), Acc-Ross (eiendomsontwikkelingsbedryf) en African Dawn Capital (finansiëledienstebedryf).

Hierdie vyf aandele verteenwoordig die bedrywe wat die Suid-Afrikaanse ekonomie die afgelope paar jaar aangeblaas het.

Die vraag ontstaan dikwels watter soort beleggingstrategie Jan en San Publiek moet volg indien op die AltX belê wil word.

“Die beste (strategie) is om ’n goeie maatskappy te kies wat jy weet oor vyf of tien jaar nog daar sal wees en dan sy aandele teen die regte prys te koop,” sê mnr. Alistair Lea, portefeuljebestuurder by Coronation.

“Ek sal nooit by iemand aanbeveel om ’n korttermynstrategie te volg nie. Met kort termyn kom risiko en jy moet bereid wees om geld te verloor.”

Mnr. Rudi van der Merwe, portefeuljebestuurder by Standard Bank, sê beleggers is nou meer op risiko ingestel as op die prys van aandele. Dit is die gevolg van die strammer krediet- en likiditeitsmark en kan in AltX-aandele se prys-verdienste-verhouding ?(p/v) gesien word.

Hy maan beleggers ook om ’n langtermyn- eerder as korttermynbenadering van aandele op die AltX te volg.

“Beleggers moet hul AltX-aandele versigtig kies en moet bereid wees om ’n paar jaar daaraan vas te byt,” sê hy.

Oor die lopie van noterings op dié alternatiewe beurs aan die einde van verlede jaar, is albei hierdie fondsbase versigtig.

“Daar was definitief opportunistiese noterings toe die mark met likiditeit oorspoel is,” sê Lea. “Dit gebeur maar in markte.”

Volgens hom het van die maatskappye op die alternatiewe beurs nie om die regte redes, waarvan kapitaalverkryging die belangrikste is, genoteer nie. “Van die bestuur van sommige van die kleiner aandele het genoteer om wins te maak en dan te hardloop.”

Hy is egter oortuig daar is geld te maak op die AltX en dat daar goeie maatskappye genoteer is.

Van der Merwe sê dit is ’n sikliese ding en die afswaai in die kleiner aandele se pryse die afgelope paar maande is normaal.

“Dit gebeur veral met kleiner aandele gedurende ’n oplewing en dan ’n afswaai in die mark.”

Hy sê daar is nou meer realisme in die mark. “Dit kan gesien word in die gebrek aan belangstelling vir nuwe noterings.”

Die lopie van noterings verlede jaar was volgens Van der Merwe van ’n beter gehalte as die lopie aan die einde van die 1990’s.

Hy sê ons kan wel verwag dat ’n paar van die kleiner aandele in die huidige marktoestande van die beurs kan afval.