Ontkoppeling is ’n nuwe term wat die finansiële wêreld lekker aan die gesels het.

Dit verwys na ontluikende markte wat hulle “losmaak” van wat in ontwikkelde markte gebeur en word veral gekenmerk deur voortgesette sterk groei in die Ooste. Of, om meer spesifiek te wees, China wat as ontluikende mark voortgroei terwyl die ontwikkelde markte se groei afplat.

Volgens Alphen Batebestuur, ’n filiaal van PSG Fondsbestuur, het Julie 2007 se kredietprobleme in die VSA aanvanklik gesorg vir groter wisselvalligheid.

Maar slegs drie maande later, in Oktober, het aandele in ontluikende markte nuwe hoogtes bereik. Hierdie verloop van gebeure was goeie nuus vir diegene wat voorstanders is van die ontkoppelingsteorie.

Máár van einde Oktober tot Januarie vanjaar het ontluikende markte groot druk op verkope gehad en die uitvloei van kapitaal was massief, volgens Alphen Batebestuur.

En só het die ontkoppelingsteorie opnuut ’n terugslag gehad omdat dit gelyk het of ontluikende markte al weer, soos in die verlede, die las dra van ‘n wêreldekonomie wat verlangsaam.

En net toe almal die teorie wil afskryf, kom daar ’n mate van stabiliteit in die wêreld se finansiële markte met van die ontluikende markte wat die voortou neem.

Alphen Batebestuur meen die ontkoppelingsteorie oor China en die res van die wêreld het weer lewe gekry.

En dit gaan dan moontlik beteken dat al neem Amerikaanse ekonomiese groei af, gaan China redelik immuun bly.

En dít sal ’n positiewe uitwerking op ander ontwikkelende lande hê.