Liana Mocke
Ontluikende markte, waaronder ook Suid-Afrika, het ’n goeie 2007 agter die rug – met China en Indië die voorlopers en Brasilië en Turkye wat ook goed gevaar het.
Maar die VSA-kredietkrisis en vrese vir ’n Amerikaanse resessie het die markte nie sonder wonde gelaat nie en aan die begin van 2008 het ontluikende markte kwaai gely onder beleggersvrese.
Die MSCI-indeks vir ontluikende markte het byvoorbeeld met 12% geval – meer as die MSCI Wêreldindeks – en boonop dui studies daarop dat beleggers in ontluikende markte hulle vanjaar op verliese moet voorberei, sê die International Herald Tribune van 12 Februarie 2008.
Dit het aan die begin van 2008 gelyk of die “ontkoppelingsteorie,” (berig hierby), sy moses teëgekom het deurdat ontluikende markte hul eie vertoning nie noodwendig van dié van die VSA kan skei nie.
Die jaar is nog in sy babaskoene, maar daar is steeds ’n verwagting dat veral China dit gaan regkry om hom “te ontkoppel” van gebeure in die ontwikkelde markte en sal voortstu met groei, al is dit met ’n stadiger pas as verlede jaar.
Mnr. Roelof Horne, portefeuljebestuurder by Investec Batebestuur, sê die skuld vir die swakker vertoning van ontluikende markte aan die begin van die jaar kan grootliks toegeskryf word aan beleggers wat sku word vir risiko in tye van wisselvalligheid.
“In Januarie het ons weer eens vrese van ’n Amerikaanse resessie ervaar en erge druk op die wêreldwye ekonomie. Dit het daartoe gelei dat beleggers aandele verkoop en beleggings met minder risiko begin soek het.”
Hy sê die impak op ontluikende markte is tipies aangedryf deur kleinhandel-effektetrustbeleggers wat geld onttrek uit ontluikende markte. Dit veroorsaak weer dat portefeuljebestuurders verplig word om te verkoop om die aflosse uit die fondse te finansier.
“Daarom, al is probleme gelokaliseerd in ’n spesifieke gebied of land, sal ons dikwels vind dat ontluikende markte verkoop namate die verpligte verkope van fondse ’n uitkring-effek veroorsaak.”
Hoewel sleg weggespring is, lyk dit nou weer of ontluikende markte steeds goed kan vaar, selfs beter as die groter ontwikkelde markte.
Wat in baie ontluikende markte, soos Brasilië, se guns tel, is verstedeliking en ekonomiese groei, wat dikwels tot ’n middelklas met groter besteebare inkomste lei.
“Ons verwag dat ontluikende of verwante markte vanjaar goeie ekonomiese groei gaan lewer, dít ten spyte van ’n skerp afname in die ontwikkelde wêreld,” sê Horne.
Die vooruitsig vir die aandelemarkte is egter nie so duidelik nie. “Ek verwag dat grondliggende faktore, soos ekonomiese groei wat maatskappyverdienste aandryf, steeds vir positiewe verwikkelinge sal sorg.”
Ontluikende lande se aandelemarkte lok dikwels baie aandag van internasionale beleggers wat deur plaaslike inwoners aangevul word.
“Dan is daar geen keer meer nie.”
Horne sê hy is optimisties oor Afrika se markte omdat die meeste (Suid-Afrika uitgesluit), nie ’n verbintenis met ander ontluikende of ontwikkelde markte het nie.
“Hulle word aangedryf deur plaaslike beleggers en hul vertoning word meestal bepaal deur plaaslike faktore.
“In die huidige wispelturige en vrees-gedrewe wêreldmarkte is Afrika ’n baie aangenamer plek om te wees.”
