Die Sanlam Demutualiseringstrust het nóg ’n veldtog begin om sowat 60 000 polishouers op te spoor wat nog nie hul gratis Sanlam-aandele opgeëis het nie. Dié sowat 24 miljoen onopgeëiste aandele het ’n markwaarde van sowat R470 miljoen.
Die 60 000 polishouers was geregtig op gratis Sanlam-aandele toe die finansiëledienstegroep in 1998 gedemutualiseer en op die JSE en Namibiese aandelebeurse genoteer het.
Polishouers het nog net tot 22 Oktober vanjaar kans om hul aandele op te eis waarna die toekenning verval en die aandele na Sanlam oorgedra word.
Die trust is in 1998 vir ’n tienjaar-tydperk gestig vir die bewaring van die aandele asook om polishouers op te spoor wat nie hul aandele opeis nie.
Sowat 2,2 miljoen polishouers was op 15 Oktober 1998 geregtig op gratis aandele, van wie 562 000 nie hul aandele voor daardie datum opgeëis nie. Die trust het sedertdien, deur verskeie veldtogte, die aantal “verlore” polishouers na 60 000 verminder.
Die aantal gratis aandele wat aan kwalifiserende polishouers toegeken is, wissel na gelang van die soort en aantal polisse wat in in 1998 gehou is, maar die minimum toekenning was 300 aandele per polishouer.
Die trust het intussen ekstra aandele namens polishouers aangekoop met die dividende wat oor die jare uitbetaal is. Dit beteken dat ’n minimum van 75 ekstra aandele by die oorspronklike toekenning per polishouer gevoeg is.
Dié 375 aandele teen Sanlam se aandeelprys van R19,36 vandeesweek is R7 260 werd. Die aandele het sy beursdebuut in 1998 teen R6 per aandeel gemaak.
Hoe om jou aandele op te eis:
Die riglyne en proses om gratis aandele op te eis, is eenvoudig.
As jy ’n geldige Sanlam-polis tussen 31 Maart en 15 Oktober 1998 gehad het, kan jy vir gratis aandele kwalifiseer.
As jy nog nie sulke aandele opgeëis het nie, hou jou ID-besonderhede byderhand en skakel die Trust by 0860 68 78 78 of besoek www.sanlam.co.za.
Jy kan ook skryf aan: Die Bestuurder, Sanlam Demutualiseringstrust, Posbus 354, Sanlamhof 7532 en die verlangde identiteits?inligting en kontakbesonderhede verskaf.
Die trust sal bevestig of gratis aandele wel aan jou toegeken is en, indien wel, jou adviseer oor die proses om die aandele te bekom.
