Beleggingsprodukte wat aan die Islamitiese Sjaria-wette voldoen, groei só sterk dat die JSE nou ook ingespring het om dit vir fondsbestuurders makliker te maak om fondse saam te stel.

Die mark vir Islamitiese beleggingsprodukte sal na raming met tussen 15% en 20% per jaar groei en teen 2010 op $53,8 miljard staan, sê die JSE.

“Ons wil dit vir gewone mense moontlik maak om in kleinhandelprodukte te belê wat aan Sjaria-wette voldoen,” sê me. Ana Forssman, senior bestuurder van die JSE.

Gevolglik is die JSE besig om in samewerking met Yasaar Re?search, wat in Doebai gesetel is, na die JSE se top-40-indeks te kyk en dié aandele te identifiseer wat aan Sjaria voldoen.

Daar is drie belangrike oorwegings wat bepaal of ’n aandeel voldoen aan Sjaria. Die eerste is Riba, wat bepaal dat ’n mens nie geld mag verhandel om ’n wins te maak nie. Die tweede is Ghara, wat met onsekerheid of risiko te doen het. Ingevolge Sjaria moet daar deursigtigheid en openbaarmaking in alle kontrakte wees. Die derde is Haram, oftewel onreinheid, wat na sekere aktiwiteite, voedsel, drank en kommoditeite verwys wat verbode is.

Die gevolg is dat onder meer die meeste banke, tabakmaatskappye, dobbelhuise en vervaardigers van alkohol uit die beleggingsopsie gesluit moet word. Selfs maatskappye wat swaar op hefboomfinansiering steun, sal nie in die beleggingsportefeulje ingesluit word nie.

Die JSE sal van die einde van September die beleggingsbesluit vir Islamitiese beleggers baie makliker maak deur die bekendstelling van ’n Sjaria-top-40-indeks.

“Daarby is die JSE in samesprekings met ’n ander party om ’n beursverhandelde fonds bekend te stel,” sê Forssman. “Die beursverhandelde fonds sal nie onder die Satrix-handelsmerk verhandel nie.”

Een van die JSE se oogmerke met dié indeks en fonds is om ’n wegspringplek vir buitelandse beleggers te bied. “Ons wil graag sien of ons nie belangstelling vanuit die Midde-Ooste kan trek nie,” sê sy. “Dis ’n reuse-mark. Aandelebeurse in die Midde-Ooste soek na Sjaria-nakomingsprodukte en die beursverhandelde fonds sal een wees waarna hulle kan kyk.”

Forssman sluit nie die moontlikheid uit dat die JSE ook na sektor-spesifieke indekse kan kyk wat aan Sjaria voldoen nie.