Min mense is dit beskore om deur die lewe te gaan sonder om iewers die een of ander tyd skuld te maak, oftewel krediet uit te neem.

Om ’n lening uit te neem is eintlik heel normaal en nie iets om te vrees nie, mits betalings elke maand betyds gedoen word.

Dit is net wanneer jy te veel krediet uitneem dat die probleme begin. Die organisasies wat aan jou uitleen, sal jou help indien jy vasbrand – hulle wil juis nie krediet aan swak kliënte verskaf nie.

Die ombudsman vir kredietinligting sê dat voor ’n lening toegestaan word, alle kredietinliging eers by ’n kredietburo deurgegaan word. Alles is op rekenaar, selfs daardie een dag waarvan jy vergeet het toe jy nie die bykomende doktersrekening betaal het nie hoewel die mediese fonds die grootste deel gedek het.

Die ombudsman sê dit is belangrik om te besef dat nie net slegte inligting verstrek word nie. As jy byvoorbeeld ’n lening vroeër afbetaal het, verskyn die inligting daar en kan dit in jou guns tel. Hy gee die volgende inligting oor die soorte lenings wat verskaf word.

) Persoonlike lenings. Sommige banke sal aan jou lenings teen beter koerse verskaf. Daarom is dit lonend om rond te kyk voor die kontrak onderteken word. Maar pasop, rente kan baie hoog wees, selfs oor enkele maande. En maak seker jy leen van ’n maatskappy of bank wat jy vertrou.

) Oortrokke rekening. As jy ’n tjekrekening by ’n bank het, kan jy aansoek om die gerief doen. Dit beteken dat jou rekening outomaties met R10 000 of R20 000 verhoog word. In die praktyk leen jy van ’n bank en is die oortrokke rekening terugbetaalbaar.

) Kredietkaarte. Kredietkaarte kan ’n valse gevoel van rykdom skep deurdat jy nie altyd bewus is van wat oor ’n maand op ’n kaart gekoop word nie. Namate jy al nader aan jou kredietlimiet kom, verhoog die bank dikwels die bedrag, wat beteken jy raak al dieper in die skuld. As jy nie die minimum balans elke maand betaal nie, is nog rente betaalbaar.

) Winkelkaarte. Dit is deesdae ’n baie gewilde kredietinstrument en werk dieselfde as ’n gewone kredietkaart. Sommige instellings hef rente, ander is “rentevry”. Maak seker wat die voorwaardes is voordat jy die kaart gebruik.

) Huurkoop. Baie verbruikers het nie die nodige geld onmiddellik beskikbaar om vir ’n motor of hoëtroustel te betaal nie. Die bedrag word dan maandeliks afbetaal en maak die uiteindelike koopsom heelwat duurder. Let wel, die motor of enige ander produk wat gekoop word, word eers jou eiendom nadat jy dit afbetaal het. Indien betalings gestaak word voor die afbetalingstermyn verstryk, kan die bank dit terugneem.

Die ombudsman se raad: dink eers voor jy jou aan ’n krediet?ooreenkoms verbind. Beter nog, probeer spaar voordat jy iets koop. Moenie impulsief koop nie. Nog inligting is beskikbaar by www.creditombud.org.za.