Sint Patricksdag (17 Maart) was ’n merkwaardige dag vir aandelemarkte wêreldwyd.

Die JSE se indeks van alle aandele het dié dag saam met ander aandelemarkte skerp negatief geopen. In een stadium het dit met meer as 4% gedaal en teen die middag herstel om net meer as 2% laer te sluit.

Die VSA, wat geopen het net voordat al die ander gesluit het, het die dag “in die groen” geëindig – iets wat beslis Sint Patrick se goedkeuring sou wegdra!

Die skielike daling en gedeeltelike herstel van aandelemarkte is aangedryf deurdat Bear Stearn?s, die vyfde grootste beleggingsbank in die VSA, byna ineengestort het en toe te hulp gesnel is.

Bear Stearns is die jongste ongeval in die verdiepende Amerikaanse verbandkrisis. Sonder hulp sou die bank bankrot verklaar moes word.

Die Federale Reserwebank en JPMorgan het op ’n plan ooreengekom om die chaotiese gevolge te verhoed wat die bank se bankrotskap vir die finansiële stelsel sou inhou.

Bear Stearns is ’n vennoot in baie finansiële transaksies.

JPMorgan het Bear Stearns gevolglik teen $2 per aandeel oorgeneem (Bear Stearns het die vorige Vrydag teen $30 per aandeel verhandel, en teen meer as $150 per aandeel ’n jaar gelede). Die Fed het terselfdertyd ’n bykomende kredietlyn aan JPMorgan gegee en die diskontokoers (die koers waarteen die Fed geld aan banke leen) met 0,25 persentasiepunt verlaag. Die Fed het dit opgevolg deur die Fed-fondsekoers op die Dinsdag met 1 persentasiepunt te verlaag.

Die mark het aanvanklik negatief op die nuus gereageer omdat nie verwag is dat Bear Stearns so diep in die moeilikheid was nie – die aandeel was per slot van rekening $30 werd op die Vrydag – of dat die finansiële stelsel so na aan verlamming was nie.

Kort daarna het die mark egter besef die Fed doen alles in sy vermoë om die finansiële stelsel ordelik aan te pas. Die plaaslike mark het dus verbeter en die Amerikaanse mark kon die dag boonop positief afsluit.

Nog probleme kan uit die Amerikaanse verbandkrisis voortvloei. En die wêreldwye finan?siële stelsel is so ineengevleg dat die meeste instansies hierdeur geraak kan word, insluitend Suid-Afrikaanse maatskappye met geen direkte Amerikaanse verbandblootstelling nie.

Sint Patricksdag het egter gewys dat die Fed bewus is van die risiko’s wat ’n finansiële ineenstorting inhou en dat hy alles in sy vermoë sal doen om die stelsel funksioneel te hou.

) Crosoer is ’n navorser by Glacier Navorsing in die Sanlam-stal