DigiCore staan ook op die punt om sy bedrywighede na Brasilië, Mexiko en Nigerië uit te brei. Mnr. Nic Vlok, uitvoerende hoof van DigiCore, sê swaarvoertuig-opsporingstelsels en stelsels om houervrag na te volg, sal na dié lande uitgevoer word.

"Ons het die afgelope jaar en 'n half met Brasilië onderhandel en die tyd is nou ryp om in dié mark in te klim." Vlok het gesê dié ontwikkelingslande het soortgelyke omstandighede as Suid-Afrika en daar is nie werklike groot opposisie in die sektor nie. "Ons gaan al drie lande byna gelyktydig betree en die nuwe markte gegrond op ons bewese sakemodel sal teen einde aanstaande jaar resultate begin toon."

DigiCore het sy bedryfswins in die boekjaar tot einde Junie met 22% tot R22,8 miljoen opgestoot. DigiCore, wat ook in Australië, Pakistan en Europa bedrywig is, se wesensverdienste per aandeel was 7,47c teenoor die 7,31c verlede jaar en 'n slotdividend van 2c per aandeel is verklaar. Die groep het aan die einde van die boekjaar oor 'n kontantbron van R36,3 miljoen beskik (2002: R20,284 miljoen). Vlok sê DigiCore het ook begin om een van sy produkte, Tracker Locate, aan private kliënte en kleiner kommersiële vlooteienaars deur Tracker South Africa in die plaaslike mark te verkoop.

Teken in op Beeld, Die Burger of Volksblad om jou Sake24 elke dag te kry