DigiCore, ’n vlootbestuurmaatskappy wat in 26 lande sake doen, het R300 miljoen se tenders oor die volgende drie jaar losgeslaan.

Dié tenders bestaan uit vier kontrakte binne sowel as buite Suid-Afrika.

“In Suid-Afrika is die tenders van regeringskant,” sê mnr. Nick Vlok, uitvoerende hoof.

In Brittanje is die tender vir ’n waterverskaffingsnetwerk bekom.

DigiCore, wat spesialiseer in die intydse verskaffing van inligting oor waar ’n maatskappy se voertuie is, se kontrak met Southern Water, wat die suidooste van Engeland bedien, sluit 520 voertuie in. Dié kontrak is verlede maand beklink.

Vlok wou nie verder uitbrei op die besonderhede van die tenders nie en het gesê hulle “is besig om die finale kontrakte op te stel”.

“Die prys kan dalk bietjie hoër wees as die R300 miljoen wat aangekondig is,” sê hy.