Die groep het gister aangekondig dat hy pas ’n 99,84%-belang in ’n brouery daar met die naam CJSC Sarmat verkry het.

SABMiller het nie die koopprys bekend gemaak nie, maar het wel gesê die brouery se bruto bates is sowat $130 miljoen werd.

Sarmat is een van die grootste brouerye in Oekraïne. Dit bedryf een brouery, met ’n brouvermoë van 2,9 miljoen hektoliter jaarliks, in Donetsk in die ooste van die land en produseer die Sarmat-, Dnipro- en Drive Max-handelnaam-biersoorte.

Die oorname is steeds onderworpe aan die sekere goedkeurings, wat toestemming van die Oekraïense mededingingsowerhede insluit.

Oekraïne word beskou as een van die wêreld se snels groeiende biermarkte met ’n vierjaar-groeikoers van 14% per jaar tot 2006.

SABMiller staan reeds sterk in die ooste van Europa en sy biervolume-verkope het daar, luidens die groep se mees onlangse handelsverklaring vir die jaar tot 31 Maart, met 8% gegroei.

Biervolume in Roemenië het met 28% gegroei en in Pole het dit 10% groei getoon.

Mnr. Alan Clark, besturende direkteur van SABMiller Europa, het in 2006 aan Sake24 gesê Wes-Europa is minder aantreklik vir oornames omdat dié mark reeds ryp en in ander maatskappye se hande is.

“Oos-Europa hou egter steeds geleenthede . . . álmal stel in die Oekraïne belang,” het hy destyds gesê.

Hy was gister verheug om dié verkrygingsaankondiging te doen.

“Die Oekraïense biermark het uitmuntende uitbreiding in onlangse jare getoon, gedryf deur sterk ekonomiese groei, maar dit is steeds agter ander Sentraal- en Oos-Europese lande in terme van bierverbruik per persoon,” het hy luidens ’n verklaring gesê.

SABMiller het reeds Europese brouerye in onder meer Hongarye, die Tsjeggiese Republiek, Italië, Pole, Roemenië, Rusland en Slowakye. Die groep maak volgende week Donderdag sy finansiële jaarresultate bekend.