Mnr. Peter Matlare, nuwe uitvoerende hoof, sê hulle is uiters ontsteld oor die gebeure en die nodige dissiplinêre stappe sal volg.

Die Mededingingskommissie het gister dié boete bekend gemaak en gesê dit verteenwoordig 8% van Adcock se omset.

Dis nie die eerste keer dat Tiger Brands hom in dié posisie bevind nie, aangesien hy ook verskoning moes maak vir sy broodfiliaal, Albany, wat ook by kartelvorming betrokke was.

Albany is ’n boete van bykans R100 miljoen opgelê weens sy betrokkenheid by die vasstelling van broodpryse op sowel provinsiale as nasionale vlak.

Mnr. Lex van Vught, voorsitter van Tiger Brands, sê weens die boete is die top-40 mense in die groep se bonusse gehalveer.

Altesame 28 mense was by die broodprys-skandaal betrokke.

Vier was al weg toe dit op die lappe gekom het en die ander is beboet met ’n kwart van hul jaarlikse salarisse en ’n waarskuwing.

Van Vught sê die verkope van Albany-brood is nie deur die skandaal geraak nie en Tiger het nie van sy markaandeel prysgegee nie.

In die nuutste skandaal het Adcock met mededingers saamgespan deur tenders te bewimpel en die mark onderling te verdeel.

Die betrokke partye is Adcock en nog twee maatskappye in die farmaseutiese bedryf, Dismed en Thusanong.

Fresenius Kabi (FKSA) het vrywaring van vervolging onder die korporatiewe toegeeflikheidsbeleid van die kommissie ontvang.

Die maatskappye het na be?wering tenders vir mediese toerusting vir staatshospitale bewimpel.

Die departement van gesondheid het vroeër gesê Adcock Ingram Critical Care het R117,5 miljoen ontvang van ’n tender vir toerusting wat verband hou met binne-aarse voeding.

Dismed het R89 miljoen ontvang en FKSA R459,5 miljoen.

Matlare sê Tiger Brands was nie deel van dié onmededingende gedrag nie.

“Ons is baie jammer oor die voorval, maar dit was iets wat buite Tiger Brands se beheer plaasgevind het . . . ”

Tiger Brands het geen skuld aanvaar nie en is bloot betrek omdat hy die beherende maatskappy is.

Mnr. Arthur Barnett, bestuurshoof van Adcock, is sedertdien geskors.

Die res van die groep word steeds ondersoek om vas te stel of daar nog moontlike oortredings gepleeg word.

Me. Lee Mendelsohn van Edward Nathan Sonnenbergs is aan die hoof van die ondersoek.

“Mededingingswetgewing is vir baie maatskappye nog ’n grys gebied. Maatskappye weet hulle moet senuweeagtig wees, maar hulle is nie presies seker waaroor hulle senuweeagtig moet wees nie,” het sy gesê.

“Maatskappye kan die wette oortree sonder dat hulle daarvan bewus is dat hulle dit doen,” het sy gesê.