Jasco se afdelings sluit in telekommunikasie, huishoudelike produkte en sekuriteit. Dit is veral die sekuriteitsafdeling wat sy bydrae tot die groep se omset en veral bedryfswins wesenlik verbeter het.

“Vier jaar gelede het ons ons verbind tot ’n kernstrategie van verkrygende en organiese groei en om ’n gediversifiseerde groep met sterk groeistrategieë daar te stel,” sê mnr. Martin Lotz, uitvoerende hoof.

“Die afgelope jaar het die sukses van ons diversifiseringstrategie sterk deurgeskemer deurdat ons in staat was om die uitwerking van moeilike en veranderende markte op verskeie terreine van ons onderneming die hoof te bied.”

Volgens hom sal Jasco voortgaan om na moontlike oorname-teikens te kyk, maar daar moet “in gedagte gehou word dat hy pas ’n groot transaksie gedoen het en dit eers moet verteer”.

Dié transaksie verwys na Jasco se verkryging van ’n belang van 34% in die kabelvervaardiger M-Tec van Jasco se bemagtigingsvennoot CIH vir ’n bedrag van R214,1 miljoen.

AfroCentric, ’n ander bemagtigingsgroep, sal ’n belang van 34,9% in Jasco teen tussen R98,4 miljoen en R99 miljoen van CIH verkry. CIH sal op sy beurt ’n belang van 34,7% in AfroCentric verkry en ’n direkte belang van 24% in Jasco behou.

Lotz verwag dat die jaar wat voorlê positief vir die groep sal wees. “Ons verwag voortgesette groei in ons telekommunikasie-afdeling en ’n voortsetting van die gevolge van die omdraai-strategie in die sekuriteitsafdeling. Hoewel die huishoudelike-produkte-afdeling in moeilike handelsomstandighede sake doen, behoort die uitbreiding van ons produk-reeks en klantebasis ons in staat te stel om ons prestasie van die 2008-boekjaar te handhaaf.”

- Omset: R519,1 miljoen (+28,4%)

- Bedryfswins: R49,5 miljoen (+25%)

- Nabelaste wins: R33,5 miljoen (+27,9%)

- Wesensverdienste per aandeel: 49c (+29%)

- Dividend per aandeel: 16c (+23%)