Mnr. Albert Corcos, uitvoerende hoof van die internasionale sementvervaardiger Lafarge se Suid-Afrikaanse bedrywighede, het gister tydens ’n mediabesoek aan die groep se nuwe sementmeule by Randfontein gesê planne vir die aanleg in Mafikeng is gestaak.

Die Egiptiese sementreus Orascom het byna ’n jaar gelede bekend gemaak hy gaan ’n moderne sement-aanleg bou met ’n produksievermoë van 2 miljoen ton per jaar.

Die totale sementverbruik in Suid-Afrika is sowat 15 miljoen ton.

Tydens konstruksie sou 1 400 mense op die perseel werk en 400 tot 500 permanente poste sou geskep word.

Die aanleg sou vroeg in 2010 in bedryf wees.

Die transaksie het gevolg nadat die Suid-Afrikaanse departement van handel en nywerheid Orascom met die voorstel genader het, het Orascom destyds gesê.

In Desember verlede jaar het Lafarge Orascom oorgeneem, maar toe nog aangedui dat hy met die Mafikeng-planne voortgaan.

Volgens Corcos het die ooreenkoms met Orascom egter bepaal dat die plaaslike vennote vir die nodige prospekteerregte sou sorg.

Hy het nie gesê na watter vennoot hy verwys nie, maar in die oorspronklike aankondiging is aangedui dat 32,5% van die nuutgestigte Mafikeng Cement Company gehou is deur die Barolong-Boo Rapulana tradisionele raad en die Barolong-Boo tradisionele raad namens hul gemeenskappe, asook die Osman-familietrust, Bazanfamilietrust, Lezak-familietrust en Redsun Enterprises.

Hy het gesê die Mafikeng-munisipaliteit en Orascom is mislei en die prospekteerregte het nie gerealiseer nie.

“Lafarge het aan die Mafikeng-munisipaliteit gesê ons stel steeds belang in die projek, maar nie met dié vennote nie.” Tot dusver het die projek nie herleef nie.

Corcos het gesê Lafarge oorweeg ander persele vir verdere uitbreiding, maar daar is nog heelwat ruimte om sy huidige aanleg in Lichtenburg verder uit te brei. “Die vraag is egter of ons geografies wil uitbrei om ander markte te bedien.” Dít sal volgens Corcos bepaal waar die perseel vir Lafarge se toekomstige uitbreidings is.