Dít volg op gesprekke tussen mnr. Dirk Hermann, uitvoerende adjunkhoof van Solidariteit, en mnr. Hendrik du Toit, uitvoerende hoof van Investec Batebestuur.

Volgens Hermann het Investec die konteks van die maatskappy se optrede verduidelik. “Ons is daarvan oortuig dat geen misleidende optrede plaasgevind het nie.”

Solidariteit het die RFD vroeër versoek om ondersoek in te stel of Investec doelbewus probeer het om sy aandeelprys te beïnvloed in afwagting van die inflasiemandjie-kritiek later.

Investec se inflasiekritiek het gister verdere opslae gemaak toe mnr. Tito Mboweni, president van die Reserwebank, opnuut kritiek op die finansiële groep uitgespreek het.

Mboweni het in ’n televisie-onderhoud Investec daarvan beskuldig dat hy monetêre beleid wil vooruitloop deur die Reserwebank te dwing in ’n sekere siening oor rentekoerse.

“Investec sal nou moet verduidelik aan die RFD,” het Mboweni benadruk.

Du Toit het vanuit Londen gesê daar was nog nooit enige verband tussen aandele-aankope deur Investec se topbestuur en die kritiek op die inflasiesyfers nie. Solidariteit se aantygings berus op valse gronde.

“Die stygings in bankaandele wêreldwyd ná die aankope het meer te make gehad met destydse uitsprake deur die Federale Reserweraad in die VSA en die dalende olieprys.”

Volgens Du Toit is bankaandele wêreldwyd laag en is dit direkteure se prerogatief om te koop wanneer hulle wil. Daar is trouens nie altyd die geleentheid om dit te kan doen nie, soos wanneer geslote tydperke geld, het hy benadruk.

“Die inflasiedebat is iets heel anders.”

Laer inflasie is goed vir ’n ekonomie. Die rede vir Investec se kritiek op die ou mandjie en vertraagde inwerkingstelling van die nuwe is dat stygende inflasieverwagtinge ’n groot gevaar vir enige ekonomie inhou.

“Indien dit te laat aangepak word, is baie pyn nodig om dit later in bedwang te bring,” het Du Toit gesê.

Hermann sê Solidariteit het hom nog nooit as ’n kenner van aandeleverhandelings voorgehou nie. “Juis daarom het ons die RFD gevra om dit te ondersoek aangesien dit vir ons gelyk het of Investec verkeerd opgetree het.”

Hy sê die fokus sal voortaan val op die ongeloofwaardigheid van huidige inflasiesyfers. “Investec het onderneem om ons daarmee te help.”

’n Woordvoerder van die RFD het gesê normaalweg ondersoek die RFD eers aandeletransaksies nadat hulle deur die JSE se toesighoudingsafdeling oor moontlike verdagte transaksies ingelig is.

Hy is nie bewus daarvan dat die JSE sodanige inligting oor die Investec-transaksies oorgedra het nie.

Investec-direkteure het op 11 Junie begin aandele aankoop nadat Investec se aandeelprys die afgelope jaar meer as die helfte van sy waarde verloor het. Normaalweg word dit in die mark vertolk as ’n teken van vertroue in ’n maatskappy wat onder ’n negatiewe stemming deurloop.